இந்திய திரைப்படங்களில் மிக முக்கியமான படமாகவும், தமிழ் சினிமாவின் மிகச் சிறந்த வெற்றிப் படங்களில் ஒன்றாகவும் இடம் பிடித்திருக்கும் திரைப்படம் ‘ஜென்டில்மேன்’.
மீண்டும் இப்படத்தை திரைக்கு கொண்டு வர மெகா தயாரிப்பாளர் குஞ்சுமோன் முடிவு செய்துள்ளார்.
இப்படம் வரும் டிசம்பர் 11- ம் தேதி உலகம் முழுவதும் மீண்டும் வெளியாகிறது.
இந்த மறு வெளியீட்டுத் தேதியை உறுதிப்படுத்தும் வகையில், புதிய போஸ்டர் ஒன்றையும் தயாரிப்பாளர் குஞ்சுமோன் வெளியிட்டுள்ளார்.
1993-ல் வெளியான ‘ஜென்டில்மேன்’ திரைப்படம், S.ஷங்கர் இயக்குநராக அறிமுகமான படைப்பாகும்.
இவரது திரைக்கதை, பிரம்மாண்டமான காட்சி அமைப்பு, பாடல்களை உருவாக்கியவிதம் என்று இப்படம் ஷங்கருக்கு தென்னிந்திய சினிமாவில் தனி இடத்தைக் கொடுத்தது.
இதன் மூலம் தனது பாணியில் கலைஞர்களை உருவாக்க முடியும் என்று நிரூபித்துக் காட்டினார் தயாரிப்பாளர் கே.டி.குஞ்சுமோன்.
800-க்கும் மேற்பட்ட படங்களை வினியோகம் செய்த அனுபவங்கள் மூலம் இந்த மாதிரி மெகா படங்களை தனது கமர்சியல் பாணியில் அடுத்தடுத்து உருவாக்கினார் குஞ்சுமோன்.
‘ஆக்ஷன் கிங்’ அர்ஜுன் நடித்த இத்திரைப்படம், உலக அளவில் மிகப் பெரிய வெற்றியைப் பெற்றது.
விறுவிறுப்பான சண்டைக் காட்சிகள், காதல் என மக்களுக்கு பிடித்தப் படமாக ஹிட் அடித்தது.
இன்று நடந்து வரும் சமூக முக்கியத்துவம் வாய்ந்த ஒரு பிரச்சனை அன்றே, இக்கதையின் முக்கிய கருவாக இருந்ததால் இன்றும் இப்படத்தை மக்கள் பேசிக் கொண்டே இருக்கிறார்கள்.
‘ஜென்டில்மேன்’ திரைப்படம் மீண்டும் திரையரங்குகளில் வெளியாகவுள்ளது என்ற அறிவிப்பு, திரைப்பட ஆர்வலர்களையும், இன்றைய இளம் தலைமுறை ரசிகர்களையும் நிச்சயம் உற்சாகப்படுத்தும்.
படங்களை அகன்ற திரையில் பார்ப்பதே ரசிகர்களுக்கு பேரானந்தம்.
A.R.ரஹ்மானின் இசையில் காலத்தால் அழியாத பாடல்கள், ஷங்கரின் தனித்துவமான இயக்க பாணி, மற்றும் அர்ஜுனின் மிகச் சிறந்த நடிப்பு ஆகியவற்றை கொண்ட இந்தப் பிரம்மாண்டமான படத்தை மீண்டும் பெரிய திரையில் கண்டு ரசிக்கும் வாய்ப்பை இது ரசிகர்களுக்கு வழங்குகிறது.
ஜென்டில்மேன் ஃபிலிம் இன்டர்நேஷனல் (Gentleman Film International K.T.குஞ்சுமோன் தயாரித்துள்ள இப்படத்தில், மதுபாலா, வினீத், சுபஸ்ரீ, M.N.நம்பியார், சரண் ராஜ், அஜய் ரத்னம், கவுண்டமணி, செந்தில். ராஜன் பி.தேவ் ஆகியோர் முக்கிய கதாபாத்திரங்களில் நடித்துள்ளனர்.
நட்புக்காக பிரபுதேவா – கௌதமி நடித்த ‘சிக்குப் புக்கு ரயிலே’ பாடல் பல தலைமுறைகளை கடந்து இன்றும் பிரபலமாக உள்ளது குறிப்பிடத்தக்கது.
பால குமரன் வசனங்களை எழுத, கவிஞர் வைரமுத்து மற்றும் கவிஞர் வாலி இருவரும் பாடல்கள் எழுதியுள்ளனர். கலை இயக்குநராக தோட்டா தரணியும், படத்தொகுப்பாளர்களாக V.T. விஜயன் மற்றும் B.லெனின் இருவரும் பணியாற்றியுள்ளனர்.
இப்படம் இப்போது 4K அல்ட்ரா ஹெச்டி (4K Ultra HD) காட்சித் தரம் மற்றும் மேம்படுத்தப்பட்ட 7.1 சரவுண்ட் சவுண்ட் (7.1 suround sound) என நவீன தொழில் நுட்பத்துடன் மீண்டும் திரைக்கு வருகிறது.
கிரேஸ் ஃபிலிம் மீடியா (Grace Film Media) பேனரின் அனில் குமார் இப்படத்தை விநியோகம் செய்கிறார்.
வரும் டிசம்பர் 11 முதல் உலகம் முழுவதும் மீண்டும் வெளியாகவுள்ள இந்த ‘ஜென்டில்மேன்’ திரைப்படம், 1990-களின் பொற்காலத் தமிழ் சினிமாவின் நினைவுகளை மீண்டும் பெரிய திரையில் கொண்டு வர உள்ளது.
