நாயகனாக தொடர்ந்து ஹிட் படங்களை வழங்கி முத்திரை பதித்து வரும் சந்தானம் நடிப்பில் காமெடி-குடும்ப சென்டிமென்ட் கலந்து உருவாகியுள்ள படம் ‘சபாபதி.’
இத்திரைப்படத்தை ஆர்.கே.என்டர்டெயின்மென்ட் சார்பில் தயாரிப்பாளர் சி.ரமேஷ்குமார் தயாரித்துள்ளார்.
இந்தப் படத்தில் எம்.எஸ்.பாஸ்கர், பிரீதி வர்மா, சாயாஜி ஷிண்டே, ‘விஜய் டிவி’ புகழ், சுவாமிநாதன், ‘காமெடி பஜார்’ மாறன் உள்ளிட்டோர் முக்கிய வேடங்களில் நடித்துள்ளனர்.
ஒளிப்பதிவை பாஸ்கர் ஆறுமுகம் கவனிக்க, படத் தொகுப்பை லியோ ஜான் பால் கையாண்டுள்ளார். சாம் சி.எஸ். இசையமைக்க, சண்டைக் காட்சிகளை ஹரி தினேஷ் வடிவமைத்துள்ளார். இயக்குநர் ஆர்,ஸ்ரீநிவாச ராவ் இந்தப் படத்தை எழுதி, இயக்கியுள்ளார்.
திக்கு வாயால் அவதிப்படும் வாலிபர் கதாபாத்திரத்தில் முதல் முறையாக இப்படத்தில் சந்தானம் நடித்துள்ளார். நகைச்சுவை நிறைந்த இந்த திரைப்படத்தில் தந்தை-மகனுக்கிடையேயான உறவு குறித்து அழகாக காட்டப்பட்டுள்ளது. சந்தானத்தின் நடிப்பு மிகவும் பேசப்படும் என்று படக் குழுவினர் தெரிவிக்கிறார்கள்.
திரையரங்குகளில் அடுத்த மாதம் வெளியாகவுள்ள இத்திரைப்படத்தின் தொலைக்காட்சி ஒளிபரப்பு உரிமையை கலர்ஸ் டிவி வாங்கியுள்ளது.
சந்தானம் படங்களுக்கு மக்களிடையே இருக்கும் வரவேற்பை கருத்தில் கொண்டு மிகப் பெரிய விலைக்கு ‘சபாபதி’ தொலைக்காட்சி உரிமையை கலர்ஸ் டிவி வாங்கியுள்ளது.
