full screen background image

“குஷ்பூ மாதிரி மனைவி அமைந்தால் 120 வருஷம் வாழலாம்” – விடிவி கணேஷின் கிண்டல்..!

“குஷ்பூ மாதிரி மனைவி அமைந்தால் 120 வருஷம் வாழலாம்” – விடிவி கணேஷின் கிண்டல்..!

இயக்குநர் சுந்தர்.சி.-யின் ‘அரண்மனை’ பட வரிசையில் நான்காம் பாகமாக உருவாகியுள்ள திரைப்படம் ‘அரண்மனை-4’.

இப்படத்தில் சுந்தர்.சி முதன்மை பாத்திரத்தில் நடிக்க, தமன்னா, ராஷி கண்ணா, யோகி பாபு, கோவை சரளா, கே.ஜி.எஃப்.ராம், VTV கணேஷ், சேசு, ஜேபி, டெல்லி கணேஷ், சந்தோஷ் குமார், தீரஜ் விஷ்ணு ரத்தினம், S.நமோ நாராயணன், மொட்டை ராஜேந்திரன், சிங்கம்புலி உட்பட பெரும் எண்ணிக்கையிலான நட்சத்திரக் கூட்டமே இணைந்து நடித்துள்ளது.

தயாரிப்பு – Avni Cinemax (P) Ltd & Benz Media PVT LTD, எழுத்து, இயக்கம் – சுந்தர்.சி., வசனம் – வெங்கடேஷ், இசை – ஹிப்ஹாப் தமிழா, ஒளிப்பதிவு – இசக்கி கிருஷ்ணசாமி, படத் தொகுப்பு : ஃபென்னி ஆலிவர், கலை இயக்கம் – பொன்ராஜ், சண்டைப் பயிற்சி – ராஜசேகர்.K., ஸ்டில்ஸ் – V.ராஜன், பத்திரிக்கை தொடர்பு – சதீஷ் (AIM).

இந்த அரண்மனை’ படத்தின் நான்காம் பாகம், மிகப் பெரும் பொருட்செலவில், பெரும் நட்சத்திரக் கூட்டணியுடன் பிரமாண்டமாக உருவாகியுள்ளது. முதல் மூன்று பாகங்கள் போலவே குடும்பங்கள் கவலை மறந்து சிரித்துக் கொண்டாடும்  வகையிலான ஹாரர் காமெடியாக இப்படத்தை உருவாக்கியுள்ளார் இயக்குநர் சுந்தர்.சி.

விரைவில் திரைக்கு வரவுள்ள இப்படத்தின் டிரைலர் வெளியீட்டு விழா, திரை நட்சத்திரங்கள் சூழ, பத்திரிக்கை ஊடக நண்பர்கள் முன்னிலையில் கோலாகலமாக நடைபெற்றது.

இந்நிகழ்வினில் தயாரிப்பாளர் குஷ்பு பேசும்போது, “இப்படம் நான்கு பாகங்கள்வரை வெற்றிகரமாகப் போக முக்கிய காரணம் சுந்தர்.சி.தான். அவருடன் 30 வருடமாக வாழ்ந்து கொண்டிருக்கிறேன். அவர் ஒவ்வொரு படத்திலும் எப்படி வித்தியாசமாக ரசிகர்களை மகிழ்விக்கலாம் என எப்போதும் யோசித்துக் கொண்டே இருப்பார். என்  இரு பிள்ளைகளும், ஹாரர் திரைப்படங்களுக்கு ஃபேன். எனவேதான் அவரும் இந்த ஜானரில் தொடர்ந்து படமெடுக்கிறார்.

இந்த ‘அரண்மனை’ சீரீஸ் படங்களை சோறு கட்டிக் கொண்டு வந்து திரையரங்கில் குடும்பத்தோடு ரசிக்கும் ரசிகர்கள்தான் இந்த வெற்றிக்கு காரணம். அவர்களுக்கு நன்றி. மேலும் எங்களுக்கு உறுதுணையாக இருக்கும் Benz Media  A.C.S அருண்குமார் சார், இப்படத்தில் உழைத்த அனைத்து கலைஞர்களுக்கும் நன்றி.

ஒரு படத்தில் இரண்டு நாயகிகள் நடித்தால் அமைதியாக நடித்திருக்க முடியாது என சொல்வார்கள். ஆனால் இந்த படத்தில் தமன்னா, ராஷி கண்ணா அவ்வளவு ஒத்துழைப்பு தந்தார்கள். கோவை சரளா மேம் மற்றும் நடித்த அனைவருக்கும் என் நன்றிகள்.

எங்கள் வீட்டுப் பிள்ளை ஹிப்ஹாப் ஆதி அட்டகாசமாக இசையமைத்துள்ளார். ஒளிப்பதிவாளர் சூப்பரான விஷுவல்ஸ் தந்துள்ளார்.  எல்லோருக்கும் என் நன்றிகள். ‘அரண்மனை’ 3 பாகங்களைவிட இப்படம் இன்னும் அட்டகாசமாக இருக்கும்.  இறுதியாக எங்கள் மகிழ்ச்சிக்காக தொடர்ந்து  உழைத்துக் கொண்டிருக்கும் என் கணவர் சுந்தர்.சி-க்கு நன்றிகள்…” என்றார்.

நடிகர் சந்தோஷ் பிரதாப் பேசும்போது, “சுந்தர்.சி சார் படத்தில் வேலை பார்ப்பது, நமது அப்பா, அண்ணன் உடன் வேலை செய்வது மாதிரிதான். அவ்வளவு நன்றாகப் பார்த்துக் கொள்வார். அவருக்கு என்ன வேண்டும் என்பதை தெளிவாகச் சொல்லிவிடுவார். வேலை எப்போதும் ஜாலியாக இருக்கும். இப்படத்தில் வேலை பார்த்தது மறக்க முடியாத அனுபவம். இந்தப் படம் கண்டிப்பாக உங்கள் எல்லோரையும் சந்தோஷப்படுத்தும்..” என்றார்.

நடிகர் ஜெயப்பிரகாஷ் பேசும்போது, “நான் நடிக்க வந்து 10 வருடங்களுக்குப் பிறகுதான் சுந்தர்.சி சார் படத்தில் வாய்ப்பு கிடைத்தது. ஒவ்வொரு படத்திலும் நமக்கு வாய்ப்பு வருமா என ஏக்கம் இருக்கும். நல்ல வேலை தெரிந்த இயக்குநர் உடன் வேலை பார்க்கும்போது நமக்குள் ஒரு உற்சாகம் தானாக வரும். அவருடன் எல்லா படத்திலும் வேலை பார்க்க ஆசை.  அத்தனை கச்சிதமான இயக்குநர். நடிகர்களை மிக நன்றாகப் பார்த்துக் கொள்வார்.  இந்தப் படம் கண்டிப்பாக பிரமாண்ட வெற்றி படமாக இருக்கும். அனைவருக்கும் நன்றி..” என்றார்.

நடிகர் VTV கணேஷ் பேசும்போது, “தெலுங்கில் பிரபாஸ் படம் பண்ணிக் கொண்டிருக்கும் போதுதான் இந்தப் படம் செய்தேன். ஆனால் திடீரென சுந்தர்.சி “மீசையை எடு” என்றார். அய்யய்யோ பிரபாஸ் படம் பிரச்சனையாகிடுமென்று தயங்கினேன். ஆனால் சுந்தர்.சியின் பாசவலையினால் செய்துவிட்டேன். ஆனால் இப்போது படத்தில்  பார்க்கையில் என் தோற்றம் அவ்வளவு அட்டகாசமாக இருக்கிறது. யோகி பாபு, சரளா மேடமுடன் சூப்பராக காமெடி ஒர்க்கவுட் ஆகியுள்ளது. எப்போதும் பேய் நம்மைக் கைவிடாது என சுந்தர்.சி சொல்வார். அது இந்தப் படத்திலும் நிரூபணமாகியுள்ளது.

அவர் 120 வருடம் வாழ்வார். அதற்கு அவர் மனைவிதான் காரணம். இப்படி ஒரு  மனைவி இருந்தால், யார் வேண்டுமானாலும் 100 வயசுக்கு மேல் வாழலாம். சுந்தர் சி.க்கு வாழ்த்துக்கள். படத்திற்கு வாழ்த்துக்கள்…” என்றார்.

நடிகை கோவை சரளா பேசும்போது, “இந்தக் கம்பெனியில் நான் ஒரு கம்பெனி ஆர்டிஸ்ட். இவங்களோட எல்லா படத்திலும் நான் இருப்பேன். இவ்வளவு பெரிய படத்தை கட்டி ஆள்வது சுந்தர்.சி சாரால்தான் முடியும். சின்ன தவறு செய்தாலும் கரெக்டாக கண்டுபிடித்துச் சரி செய்து விடுவார். மிகத் திறமையானவர்.

இவரைப்போல் அனுபவம் வாய்ந்த ஒரு இயக்குநர் தமிழ் சினிமாவில் இப்போது யாருமே இல்லை. படத்தில் வேலை பார்ப்பது போன்றே இருக்காது. இப்படம் மற்ற ‘அரண்மனை’ படங்கள் போல் இருக்காது. அதைவிட அட்டகாசமாக இருக்கும். தமன்னா, ராஷிகண்ணா நன்றாக நடித்துள்ளனர். படம் வெற்றி பெற வாழ்த்துக்கள்..” என்றார்.

நடிகர் யோகிபாபு பேசும்போது, “இப்படத்தில் எனக்கு வாய்ப்பு தந்த சுந்தர்.சி சார், மற்றும் தயாரிப்பாளருக்கு நன்றி. கலகலப்பு படத்தில் வேலை பார்த்தபோது என்னை அழைத்து “நீங்க நடந்து வரும்போது உங்க தலைக்குப் பின்னாடி ஒரு சக்கரம் சுத்துது” என வாழ்த்தினார். அவரது ஆசிர்வாதத்தால் இன்னும் திரையுலகில் என் வாழ்க்கை சக்கரம் சுத்த வேண்டும். அவர் நிறைய வாய்ப்பு தர வேண்டும். எல்லோருக்கும் என் நன்றிகள்..” என்றார்.

நடிகை ராஷி கண்ணா பேசும்போது, “இதற்கு முந்தைய ‘அரண்மனை’ படத்தை விடவும் இந்த படத்தின் டிரெய்லர் அட்டகாசமாக இருக்கிறது. இந்தப் படம் கண்டிப்பாக எல்லா படத்தை விடவும் பிரம்மாண்டமாக இருக்கும். சுந்தர்.சி அத்தனை அழகாக படத்தை எடுத்துள்ளார். அவர் இந்த மாதிரி கமர்ஷியல் படங்களை எடுப்பதில் வல்லவர்.

இந்தப் படம் வேலை பார்த்தது ரொம்ப ஜாலியாக இருந்தது. நடிகை தமன்னாவுடன் இணைந்து தெலுங்கு படத்தில் வேலை செய்துள்ளேன். இப்போது தமிழில் நடிப்பது மகிழ்ச்சியாக உள்ளது. படம் அட்டகாசமாக வந்துள்ளது. ஹிப் ஹாப் ஆதி சூப்பர் பாடல்கள் தந்துள்ளார். இப்படத்தில் நானும் இணைந்திருப்பது மகிழ்ச்சி. படம் கண்டிப்பாக உங்கள் எல்லோரையும் மகிழ்விக்கும் நன்றி..” என்றார்.

நடிகை தமன்னா பேசும்போது, “சுந்தர்.சி., குஷ்பூ மேடம் இருவரும் எனக்கு ஃபேமிலி மெம்பர்ஸ் மாதிரி. பணம், வாய்ப்பு எல்லாம் அப்புறம்தான். என்னை அவ்வளவு நன்றாக பார்த்துக் கொண்டார்கள்.

சுந்தர்.சி சார் உடன் என்றால் ஓகே என்ன படம் வேண்டுமானாலும் செய்யலாம். அவரை அவ்வளவு நம்புகிறேன். மிகத் திறமையான இயக்குநர் அவர். அவர் நினைத்தால் ஹீரோக்களை வைத்து என்ன மாதிரி படங்கள் வேண்டுமானாலும் செய்ய முடியும். ஆனால் பெண்களை மையமாக வைத்து எல்லோரும் ரசிக்கும்படி கதை செய்துள்ளார், அவருக்கு நன்றி.

குஷ்பூ மேடத்தால் முடியாதது எதுவுமே இல்லை. சினிமா, பொலிடிகல் என எல்லாவற்றிலும் அசத்துகிறார். அவர் என் இன்ஸ்பிரேஷன். ராஷி கண்ணாவும் நானும் ஏற்கனவே தெலுங்கு படம் செய்துள்ளோம். மிகச் சிறந்த கோ ஆர்டிஸ்ட். மிக உண்மையானவர். என்னை அதிகம் நேசிப்பவர். அவர் நிறைய பியூட்டிஃபுல் படங்கள் செய்துள்ளார். வாழ்த்துக்கள். கோவை சரளா மேடம் செம்ம ஜாலியானவர். இப்படத்தில் நானும் இணைந்திருப்பது மகிழ்ச்சி. இப்படம் வெளியாவதற்காக நானும் ஆவலுடன் காத்துக்கொண்டிருக்கிறேன். நன்றி..” என்றார்.

இசையமைப்பாளர் ஹிப்ஹாப் ஆதி பேசும்போது, “இந்த அரண்மனை-4, சுந்தர்.சி அண்ணாவுடன் எனக்கு ஆறாவது படம். என்னை இசையமைப்பாளராக, ஹீரோவாக அறிமுகப்படுத்தி என் மீது மிகப் பெரும் அன்பையும், நம்பிக்கையையும் வைத்திருக்கும் அண்ணாவிற்கு நன்றி. ‘அரண்மனை-4’ எல்லாப் படங்களையும் விடப் பிரம்மாண்டமான வெற்றி பெறும்.

தமன்னா, ராஷிகண்ணா இருவரும் மிக அழகாக இருக்கிறார்கள். படத்தில் அத்தனை அழகாக நடித்துள்ளனர். யோகிபாபு, சரளா மேடம் எல்லோருக்கும் வாழ்த்துக்கள். நன்றி..” என்றார்.

இயக்குநர் சுந்தர்.சி பேசும்போது, “இந்த ‘அரண்மனை’ நான்காம் பாகத்துடன் வந்துள்ளேன். முதல் பாகம் செய்யும்போது, இது இப்படி சீரிஸாக மாறும் என நினைக்கவே இல்லை. ‘அரண்மனை-3’ படத்திற்கு கிடைத்த வெற்றிதான் இப்படம் உருவாக காரணம். எப்போதும் நான் பணத்திற்காக இந்தப் படத்தைச் செய்யலாம் என நான் நினைத்ததே இல்லை. ஒரு நல்ல கதை, ஐடியா கிடைத்ததால் மட்டுமே இந்தப் படத்தைத் துவக்கியுள்ளேன்.

இப்படத்திற்கும் பின் ஒரு அட்டகாசமான ஐடியா கிடைத்தது. நம் நாட்டை ஆக்கிரமித்தவர்கள் வட இந்தியாவைப் பிடித்த அளவு, அஸ்ஸாம் பக்கம் பிரம்மபுத்திராவை தாண்டிப் போகவில்லை. அது ஏன் எனக் கேட்டு ஆராய்ந்தால், பாக் எனும் ஆவிகளின் சக்தி பற்றிய சுவாரஸ்யமான விஷயம் சிக்கியது. அதை வைத்து, மிக சுவாரஸ்யமான கதையை இந்த ‘அரண்மனை-4’-ல் செய்துள்ளோம்.

நான் வேறொரு படத்தில் வேலை செய்தபோது இந்த ஐடியா கிடைத்தது. முதலில் இதில் வேலை பார்க்கலாமா எனத் தயங்கினேன். அந்த நேரத்தில் ஒரு பயணம் மேற்கொள்கையில் ஒரு சின்ன பெண், என்னிடம் “அங்கிள் ‘அரண்மனை-4’ எப்போது வரும்” என்று கேட்டார். அந்தப் பெண் என் தயக்கத்தை போக்கிவிட்டார். உடனேயே இந்த படத்தை ஆரம்பித்துவிட்டேன்.

என் தயாரிப்பாளர்கள் கதையே கேட்கவில்லை. முழு ஆதரவு தந்தார்கள். அரண்மனையின் முதல் மூன்று படங்களைவிட இப்படத்தில் எல்லாமே பிரம்மாண்டமாக இருக்கும். இப்படத்தில் இரண்டு ஹீரோயின்.

ஒரு ஹீரோயின் ஒரே நேரத்தில் அவரைப் பார்த்தால் பயமாகவும் இருக்கணும். பரிதாபமும் வரணும், குழந்தைக்கு அம்மாவாக வரணும், யாரை அணுகுவது என்று நினைத்தேன். ஆனால் தமன்னா கேட்டவுடன் ஒத்துக் கொண்டார். அட்டகாசமாக நடித்துள்ளார். அவர் கேரியரில் இப்படம், அவரது வித்தியாசமான முகத்தைக் காட்டும். இப்படம் அவருக்கு பெயர் சொல்லும் படமாக இருக்கும்.

ராஷிக்கண்ணா எனக்கு மிகவும் கம்ஃபோர்ட்டான ஆர்டிஸ்ட். என்னை முழுமையாக நம்புவார். இப்படத்தில் நன்றாகச் செய்துள்ளார். ‘அரண்மனை’ படத்தில் காமெடி முக்கியம். என் படத்திற்கு ரசிகர்கள் வரக் காரணம் காமெடிதான். அதை நிறைவேற்றணும்.

பேப்பரில் நாங்கள் எழுதுவது பாதிதான், ஆர்டிஸ்ட்டுகள்தான் அதை முழுதாக மாற்ற வேண்டும். அந்த வகையில் யோகி பாபு, சரளா மேடம், VTV கணேஷ், சிங்கம் புலி எல்லோரும் கலக்கியுள்ளார்கள்.

மொத்தத்தில் இந்த ‘அரண்மனை-4’ திரைப்படம், என் மனதிற்கு மிகவும் பிடித்த படமாக வந்துள்ளது. பின்னணி இசையில் வழக்கமான பேய் படம் போல இல்லாமல் வித்தியாசமாகச் செய்துள்ளார் ஆதி. எனக்கு எப்போதும் சப்போர்ட்டாக இருக்கும். என் மனைவிக்கும் நன்றி. படத்தில் உழைத்த அனைவருக்கும் நன்றி. படம் ஏப்ரலில் வருகிறது. அனைவரும் ஆதரவு தாருங்கள்..” என்றார்.

Our Score