நீண்ட காலம் தமிழ் சினிமாவில் தாக்கு பிடிக்கும் நடிகைகள் வெகு சிலரே. அந்த வகையில் தன் திறமையான நடிப்பால் ரசிகர்களை கவர்ந்த நடிகை சாந்தினிக்கு தனி இடம் உண்டு.
ஒரு திறமையான நடிகைக்கு தன் கண்களும் அவை வெளிப்படுத்தும் உணர்வுகளும் மிக முக்கியம். அது நடிகை சாந்தினிக்கு மிக இயல்பாக அமைந்துள்ளது. அவரின் நடிப்புப் பயணத்தில் கண்களாலும் நடிப்பாலும் மிரட்டிய படங்கள் உண்டு.
‘சித்து +2’ படத்தில் ‘திரைக்கதை மன்னன்’ பாக்யராஜ் அவர்களால் அறிமுகப்படுத்தப்பட்டு கடைசியாக வெளியான ‘பெட்டிக் கடை’ படம் வரையிலும், 18 தமிழ்த் திரைப்படங்களிலும், சில தெலுங்கு படங்களிலும் நாயகியாக நடித்திருக்கும் இவரின் கலைப் பயணம் தொய்வின்றி இப்போதும் தொடர்ந்து கொண்டுதான் இருக்கிறது.
‘ராஜா ரங்குஸ்கி’ படத்தில் இவர் ஏற்று நடித்த வில்லி கதாபாத்திரம் பலரின் புருவங்களை உயர்த்தியது. இவருக்கு நடிப்பில் பெரிய நல்ல பெயரையும் பெற்று கொடுத்தது.
இவரது நடிப்பைக் கண்டு வியந்த பாலாஜி சக்திவேல், இவரை அணுகி ஒரு கதை சொல்ல, அந்த கதை சாந்தினிக்கு மிகவும் பிடித்தவிட.. உடனே நடிக்க சம்மதம் தெரிவித்துள்ளார். அந்தப் படம் தற்போது முடியும் தருவாயில் உள்ளது.
மேலும், மென்மையான உணர்வுகளை அழகான திரைப்படமாக்கும் ராதாமோகன் சாந்தினியின் நடிப்புத் திறனை கவனித்து தனது புதிய படத்தில் நடிக்க அழைத்துள்ளார். எஸ்.ஜே.சூர்யா கதாநாயகனாக நடிக்கும் இப்படத்தில் சாந்தினி கதாநாயகியாக நடிக்கிறார். “தன்னுடைய பட வரிசையில் இந்தப் படம் மிக முக்கியமான படமாக இருக்கும்…” என்கிறார் சாந்தினி.
ஒரு புறம் பாலாஜி சக்திவேல் படம், மறுபுறம் ராதா மோகன் படம் என சாந்தினியின் வரிசையான படங்கள் பெரிய எதிர்பார்ப்பை ஏற்படுத்தி இருக்கின்றன. ஒரு நாயகியாக சினிமாவில் நீண்ட காலம் சாந்தினி நிலைத்து வருவதற்கு அவரது திறமை மட்டுமே பிரதான காரணம்.
“மேற்கூறிய படங்கள் தனது சினிமா வாழ்க்கையில் மிக முக்கியமான படங்களாக இருக்கும்…” என்கிறார் சாந்தினி.
