‘வசூல் ராஜா MBBS’ திரைப்படத்தில் அறிமுகமாகி, வெங்கட் பிரபுவின் ‘சென்னை 28’ திரைப்படம் மூலம் ரசிகர்களின் மனதில் ஆழமாக பதிந்து, ‘சத்தம் போடாதே’ படத்தின் சைக்கோ வில்லனாக அனைவரையும் மிரட்டி, இயக்குநர் கார்த்திக் ராஜுவின் ‘திருடன் போலீஸ்’ திரைப்படம் மூலம் எல்லா தரப்பு ரசிகர்களின் பாராட்டுகளையும் பெற்றவர், நடிகர் நிதின் சத்யா.
இவர் தற்போது ‘பிளாஸ்’ கண்ணனோடு இணைந்து, ‘ஃப்ரைடே மாஜிக் என்டர்டைன்மெண்ட்’ என்னும் திரைப்பட தயாரிப்பு நிறுவனத்தை ஆரம்பித்து இருக்கிறார்.
இந்த நிறுவனத்தின் சார்பில் நிதின் சத்யா தயாரிக்கும் முதல் படத்தை அறிமுக இயக்குநர் நந்தா மணிவாசகம் இயக்கவிருக்கிறார். இவர் இயக்குநரும், பிரபல வசனகர்த்தாவுமான விஜியிடம் இணை இயக்குநராகப் பணியாற்றியவர் என்பது குறிப்பிடத்தக்கது.
இன்னமும் பெயரிடப்படாத இந்த திரைப்படத்தின் தயாரிப்பு வேலைகள், இன்று பூஜையுடன் இனிதே தொடங்கியது.
சென்னையில் நடைபெற்ற இந்த திரைப்பட பூஜையில், பிரபுதேவா ஸ்டுடியோஸ் – டாக்டர் கே.கணேஷ், இயக்குநர் வெங்கட் பிரபு, ஒளிப்பதிவாளர் சக்தி சரவணன், நடிகர்கள் விஜய் வசந்த், வைபவ், இயக்குநர் சரண், மனு, எஸ்.பி.பி.சரண் ஆகியோர் கலந்து கொண்டார்கள்.
அது மட்டுமின்றி, தயாரிப்பு துறையில் முதல்முறையாக காலடி எடுத்து வைத்திருக்கும் நிதின் சத்யாவை ஊக்குவிக்க, ஒட்டு மொத்த ‘சென்னை 28’ படக் குழுவினரும் திரண்டு வந்து, இந்த பூஜையில் கலந்து கொண்டது மேலும் சிறப்பு.
திகில் கதைக் களத்தை கொண்டு உருவாகும் இந்த பெயரிடப்படாத திரைப்படம், நிச்சயமாக நிதின் சத்யாவின் தயாரிப்பாளர் அவதாரத்திற்கு சிறந்ததொரு அடித்தளமாக இருக்கும் என்று பெரிதும் எதிர்பார்க்கப்படுகிறது.
“திரைப்பட உலகில் இன்றியமையாததாக இருப்பது ‘ஃப்ரைடே (வெள்ளிக்கிழமை). அதனால்தான் எங்களின் நிறுவனத்திற்கு ‘ஃப்ரைடே மாஜிக் என்டர்டைன்மெண்ட்’ என்ற பெயரை தேர்ந்தெடுத்தோம்.
வலுவான கதைக் களமும், சிறந்த கதையம்சமும்தான் ஒரு திரைப்படத்தின் வெற்றிக்கு ஆணி வேர். அத்தகைய தரம் வாய்ந்த படங்களை மட்டுமே ரசிகர்களுக்கு வழங்க வேண்டும் என்ற நோக்கத்தில்தான் நான் தயாரிப்பு துறையில் அடியெடுத்து வைத்திருக்கிறேன்.
இந்த தயாரிப்பு நிறுவனம் மூலமாக தொழிலதிபர் ‘பிளாஸ்’ கண்ணனோடு கைக்கோர்த்து இருப்பது எனக்கு மகிழ்ச்சியாக இருக்கிறது. தரம் வாய்ந்த திரைப்படங்களை தயாரிக்க வேண்டும் என்ற எனது எண்ணத்திற்கு உந்துதலாக இருப்பது அவர்தான்…” என்று நம்பிக்கையுடன் கூறுகிறார் தயாரிப்பாளரும், ‘ஃப்ரைடே மாஜிக் என்டர்டைன்மெண்ட்’ நிறுவனத்தின் நிறுவனருமான நடிகர் நிதின் சத்யா.
