IMF CREATION நிறுவனத்தின் சார்பில் தயாரிப்பாளர்கள் கார்த்திக் ராஜ் மற்றும் சதீஸ் இருவரும் இணைந்து தயாரிக்கும் புதிய திரைப்படம் ‘வட்டகரா.’
இப்படத்தில் புதுமுக நடிகர்களான மற்றும் சரனேஷ் குமார், கண்ணன் மாதவன், ஹுமாய் மூவரும் கதையின் நாயகர்களாக நடிக்கின்றனர்.
மேலும் இவர்களுடன் பவர் ஸ்டார், சம்பத் ராம், கெகராஜ், சிவாஜி, ‘போராளி’ புகழ் திலிபன், பெஞ்சமின் ஆகியோர்களும் நடிக்கின்றனர்.
இசை – தாஜ்நூர், ஒளிப்பதிவு – ஜேசன் வில்லியம் படத் தொகுப்பு – அமர்நாத், பாடல்கள் – சினேகன், இளைய கம்பன், நிமேஷ், சண்டை பயிற்சி – S.R.முருகன், உடைகள் – விமல்சாரா, தயாரிப்பு நிர்வாகம் – கணேஷ், மக்கள் தொடர்பு MP.ஆனந்த், தயாரிப்பு வடிவமைப்பு – PK.விருமாண்டி.
அந்தமானில் பல குறும் படங்களை எடுத்து விருதுகள் வாங்கியுள்ள இயக்குநர் K.பாரதி கண்ணன் இந்தப் படத்தை இயக்குகிறார். இது இவருடைய முதல் படமாகும்.
இத்திரைப்படம் பற்றி இயக்குநர் கே.பாரதி கண்ணன் பேசுகையில், “நாட்டில் நடந்த சில நிகழ்வுகளைக் கதைத் கருவாகக் கொண்டு கிட்டத்தட்ட ஒரு வருட காலம் செலவிட்டு இதற்கான திரைக்கதையை அமைத்து இக்கதைக்கு தேவையான திறமையான நடிகர், நடிகைகள் தேர்வு செய்யப்பட்டு, அவர்களுக்கு கடந்த ஆறு மாத காலமாக பயிற்சி அளிக்கப்பட்டு குறுகிய காலத்தில் இப்படத்தினை இயக்கி வெளியிட முயற்சி செய்யப்பட்டுள்ளது.
மற்ற கதைகளைவிட இக்கதை வேறுபட்டு இருப்பதற்காக இப்படத்தின் கதை மட்டுமல்லாமல் இப்படத்தின் தலைப்பும் தனித்துவம் உடையாதாக இருக்க வேண்டும் என்று நினைத்துதான் ‘வட்டகரா’ என்ற தலைப்பு வைக்கப்பட்டுள்ளது.
ஆயிரம் ஆண்டுகளுக்கு முன்பு மக்கள் பயன்படுத்திய வழக்கு மொழிகளில் ஒன்றாக இருந்து வந்துள்ளது என்பதை பல முறை பரீசிலனை செய்த பிறகே இத்தலைப்பு வைக்கப்பட்டுள்ளது. இதன் மூலம் நமது மக்கள் நமது பழங்கால வழக்கு தமிழ் மொழியை தெரிந்து கொள்ளவும், ஆச்சர்யப்படவும் வைத்துள்ளது…” என்றார்.
இத்திரைப்படத்தின் பூஜை சமீபத்தில் பிரசாத் லேபில் நடைபெற்றது. இந்த நிகழ்வில் படத்தில் நடிக்கும் நடிகர், நடிகையர், மற்றும் தொழில் நுட்பக் கலைஞர்கள் அனைவரும் கலந்து கொண்டனர்.
