full screen background image

காவேரி நீர், ஸ்டெர்லைட் பிரச்சனைகளுக்காக நடிகர் சங்கம் சார்பில் போராட்டம்…!

காவேரி நீர், ஸ்டெர்லைட் பிரச்சனைகளுக்காக நடிகர் சங்கம் சார்பில் போராட்டம்…!

தென்னிந்திய நடிகர் சங்கத்தின் பத்திரிகையாளர் சந்திப்பு நேற்று மாலை ஆர்.கே.வி. தியேட்டரில் நடை பெற்றது..

இதில்  நடிகர் சங்க தலைவர் நாசர், பொருளாளர்  கார்த்தி, துணை தலைவர் பொன்வண்ணன், செயற்குழு உறுப்பினர்களான A.L.உதயா, விக்னேஷ், பிரேம், M.A.பிரகாஷ், குட்டி பத்மினி நியமன  செயற்குழு உறுப்பினர்கள் மனோபாலா ஹேமசந்திரன் ஆகியோர் கலந்து கொண்டனர்.

நிகழ்ச்சியில் தென்னிந்திய நடிகர் சங்கத்தின் தலைவரான நாசர் பேசும்போது, “இப்போது தமிழ் சினிமாவுக்கு மிகவும் இக்கட்டான சூழ்நிலை ஏற்பட்டுள்ளது. டிஜிட்டல் டெக்னாலஜி வந்த பிறகு தமிழ் சினிமாவில் நிறைய பிரச்சனைகள் உள்ளது. எந்த ஒரு தொழிலுமே விஞ்ஞான வளர்ச்சிக்கு பின்னர் செழிப்பாகத்தான் இருக்கும். ஆனால், நமது தமிழ் சினிமா மட்டும் மாறாக பல பிரச்சனைகளை சந்தித்து பின்னோக்கி சென்று கொண்டிருக்கிறது.

இதை சரி செய்யத்தான் இப்போது வேலை நிறுத்தம் தொடர்ந்து நடைபெற்றுக் கொண்டிருக்கிறது. எப்போதும் வேலை நிறுத்தம் என்றால் சில நாட்கள் நடைபெறும் அதன் பின்னர் நிறைவடைந்துவிடும். ஆனால், இதற்கு மாறாக இப்போது வேலை நிறுத்தம் தொடர்ந்து நடைபெற்றுக் கொண்டிருக்கிறது.

இந்த வேலை நிறுத்தத்திற்கு ஆதரவாக தமிழ்த் திரையுலகமே திரண்டுள்ளது. இதனால் தினமும் வேலைக்கு செல்லும் தொழிலாளர்கள் மிகவும் பாதிக்கப்படுவார்கள். இந்த இறுக்கமான சூழ்நிலை இளக வைக்க நாங்கள் சில நாட்களாக இரவும், பகலும் பேசி ஒரு முடிவுக்கு வந்துள்ளோம். அதை நடிகர் சங்கத்தின் துணை தலைவர் பொண்வண்ணன் கூறுவார்…” என்றார் .

இதைத் தொடர்ந்து நடிகர் சங்கத்தின் துணைத் தலைவரான பொன்வண்ணன் பேசும்போது, “நான் சினிமாவுக்கு வந்த காலத்தில் தயாரிப்பாளர்கள் ஒரு கூட்டு குடும்பமாகத்தான் வேலை செய்து வந்தார்கள். தயாரிப்பு என்பது ஒரு தயாரிப்பாளர் மட்டுமே செய்யும் வேலை அல்ல. அதை தமிழகத்தில் உள்ள அனைத்து விநியோகஸ்தர்களும் , திரையரங்க உரிமையாளர்களும் இனைந்து செய்யும் வேலை.

அனைவரும் ஒவ்வொரு படத்தையும் தங்களுடைய படமாக நினைத்துதான் வேலை செய்து வந்தார்கள். இதையெல்லாம் நான் பத்து வருடங்களாக கண்ணால் பார்த்திருக்கிறேன். ஒரு கூட்டாக இனைந்து செய்யப்பட்டுக் கொண்டிருந்த இந்த தொழில் இப்போது பரஸ்பர நம்பிக்கையின்மையால் தலைகீழாக மாறியுள்ளது.

திரையரங்குகளில் ஆன்லைன் டிரான்ஸ்பரன்சி கண்டிப்பாக வேண்டும். ஆன்லைன் டிரான்ஸ்பரன்சி இருந்தால் நடிகர்களின் படங்கள் தோல்வி அடையும்போது அவர்களின் சம்பளத்தை குறைக்கும்படியும், படம் வெற்றி பெறும்போது அவர்கள் அடுத்த படத்திலிருந்து அதற்கு ஏற்றவாறு சம்பளத்தை ஏற்றுவதற்கும் உதவியாக இருக்கும்.

எந்தவித கணக்கு வழக்கும் இல்லாமல் ஒரு நடிகரை சம்பளத்தை குறைக்க சொல்லும்போது அந்த நடிகர்கள் மன ரீதியாக வருத்தப்படுகிறார்கள். ஆன்லைன் டிக்கெட் புக்கிங் சார்ஜெஸ் அதிகமாக இருப்பதால் மக்கள் திரையரங்குக்கு வருவது குறைந்துள்ளது, அதனால் அதையும் குறைக்க வேண்டும். சினிமா என்பது மக்களுக்காகத்தான். நாங்கள் இந்த விஷயத்தில் தயாரிப்பாளர் சங்கத்துக்கு ஆதரவாக இருப்போம்.

மேலும் காவரி மேலாண்மை வாரியம், மற்றும் ஸ்டெர்லைட் ஆலை பிரச்சனைகளுக்காக மக்களுக்கு ஆதரவாக அழுத்தம் தரும் வகையில், விரைவில் அதற்கென ஒரு போராட்டமோ அல்லது உண்ணாவிரதமோ அடுத்த வாரத்தில் அரசாங்கத்திடம் முறைப்படி அனுமதி வாங்கி நடத்தப்படும்…” என்றார் நடிகர் சங்க துணை தலைவர் பொன்வண்ணன். 

 

Our Score