தமிழில் நீண்ட இடைவெளிக்கு பிறகு மீண்டும் கால் பதிக்கும் நடிகர் ஆசிஷ் வித்யார்த்தி..!

தமிழில் நீண்ட இடைவெளிக்கு பிறகு மீண்டும் கால் பதிக்கும் நடிகர் ஆசிஷ் வித்யார்த்தி..!

ஸ்ரீகாந்த், வித்யா பிரதீப் மற்றும் காளி வெங்கட் உள்ளிட்ட பலர் நடிக்கும் புதிய திரைப்படம் எக்கோ’.

இன்டுடிவ் சினிமாஸ் சார்பில் டாக்டர் ராஜசேகர் மற்றும் ஹாரூன் இருவரும் இணைந்து இந்தப் படத்தைத் தயாரிக்கின்றனர்.

ஒளிப்பதிவு – கோபிநாத், இசை - ஜான் பீட்டர், படத் தொகுப்பு – சுதர்ஷன், கலை இயக்கம் - மைக்கேல் ராஜ், நடன இயக்கம் – ராதிகா, சண்டை இயக்கம் - டேஞ்சர் மணி, தயாரிப்பு நிர்வாகம் - B.M.சுந்தர், ஒப்பனை – ராமச்சந்திரன், ஆடை வடிவமைப்பு – பாரதி, பாடல்கள் – ஏக்நாத், மக்கள் தொடர்பு – கே.எஸ்.கே.செல்வா.

அறிமுக இயக்குநரான நவீன் கணேஷ் இந்தப் படத்தை இயக்குகிறார்.

விக்ரம் நடித்த 'தில்' படத்தின் மூலம்  தமிழில் அறிமுகமாகி அந்தப் படத்தில், தனது வித்தியாசமான வில்லத்தனத்தால் விக்ரமுக்கு இணையாக ரசிகர்களிடம் பேசப்பட்ட நடிகர் ஆசிஷ் வித்யார்த்தி மிக நீண்ட இடைவெளிக்குப் பிறகு இந்தப் படத்தில் நடிக்கிறார்.

ஒரு காலத்தில் பிசியான வில்லன் நடிகராக மாறிய அவர் ரஜினி, விஜய், அஜீத் என அனைத்து முன்னணி நடிகர்களின் படங்களிலும் தவறாமல் இடம் பிடித்தார். ரஜினிகாந்தின் சொந்தப் படமான பாபா’விலேயே வில்லனாக நடிக்கும் வாய்ப்பு இவரை தேடிச் சென்றது.

கடந்த 2015-ம் ஆண்டில் தனுஷ் நடித்த 'அநேகன்' படத்தில் முக்கிய கதாபாத்திரத்தில் நடித்திருந்த ஆசிஷ் வித்யார்த்தி, அதையடுத்து கடந்த ஐந்த வருடங்களாக தமிழில் எந்த படத்திலும் நடிக்காமல் ஒதுங்கி இருந்தார்.

வாய்ப்புகள் தேடி வந்தாலும்கூட, ஒரே மாதிரியான கதாபாத்திரத்தில்  நடிப்பதில் தனக்கு உடன்பாடு இல்லையென்பதால் பல படங்களை தவிர்த்துவிட்டார்.

இந்தநிலையில் ஐந்து வருடங்கள் கழித்து தற்போது ஸ்ரீகாந்த் கதாநாயகனாக நடிக்கும் இந்த ‘எக்கோ’ என்கிற படத்தில் நடிக்கிறார் ஆசிஷ் வித்யார்த்தி.

“சைக்கலாஜிக்கல் திரில்லர் படமாக உருவாகும் இந்த 'எக்கோ’வில் இதுவரை நாம் காணாத ஆசிஷ் வித்யார்த்தியை பார்க்கலாம்...” என்கின்றனர் படக் குழுவினர்.