கமல்ஹாசன், ரஜினிகாந்த், விஜய், அஜித் உள்ளிட்ட முன்னணி நடிகர்களுடன் இணைந்து நடித்திருக்கும் நகைச்சுவை நடிகரான வையாபுரி, தற்போதைய இளைய தலைமுறை நடிகர்களுடனும் நடித்து வருகிறார்.
காமெடி நடிகராக மட்டுமே பரிச்சயமான வையாபுரி, ‘பிக் பாஸ்’ நிகழ்ச்சிக்குப் பிறகு காமெடி வேடங்களுடன், குணச்சித்திர வேடங்களுக்கும் கச்சிதமாக பொருந்துவார் என்ற நம்பிக்கையை பல இயக்குநர்களுக்கு கொடுத்திருக்கிறார்.
தற்போது இயக்குநர் எழிலின் இயக்கத்தில் இரண்டு படங்கள், ட்ரீம் வாரியர் தயாரிப்பில் ஷர்வானந்த் நடிப்பில் தமிழ் மற்றும் தெலுங்கில் உருவாகும் படம், ஷக்தி சிதம்பரம் இயக்கத்தில் ‘பேய் மாமா’ உள்ளிட்ட பல படங்களில் நடித்து வரும் வையாபுரி, அறிமுக இயக்குநர் ஒருவரின் இயக்கத்தில் உருவாகும் படம் ஒன்றில் கதாநாயகியின் தந்தை வேடத்தில் நடித்து வருகிறார்.
இந்த நிலையில், இந்த 2021 புத்தாண்டில் புது முயற்சி மேற்கொள்ளும் விதமாக போட்டோ ஷூட் ஒன்றை நடிகர் வையாபுரி நடத்தியுள்ளார். மிக வித்தியாசமான கெட்டப்போடு இருக்கும் வையாபுரியின் போட்டோ ஷூட் புகைப்படங்கள், சமூக வலைத்தளங்களில் வெளியாகி வைரலாகப் பரவி வருவதோடு, இளைஞர்கள் அந்த புகைப்படங்களை வைத்து பல மீம்ஸ்களை உருவாக்கி டிரெண்டிங் ஆக்கி வருகிறார்கள்.
“யாரு.. ஹாலிவுட் நடிகரா இவரு.. இல்லப்பா நம்ம ஊரு வையாபுரிப்பா…”, ”தினேஷ் கார்த்திக் செமயா இருக்காருல, யோவ் அது வையாபுரிய்யா..” இப்படி பல வகைகளில் வையாபுரியின் போட்டோ ஷூட் புகைப்படங்களை வைத்து நெட்டிசன்கள் மீம்ஸ்களை உருவாக்கி வெளியிட்டு வர, தற்போது கோலிவுட்டின் ஹாட் டாப்பிக்காகியுள்ளது வையாபுரியின் புகைப்படங்கள்.
இது பற்றி வையாபுரியிடம் கேட்டபோது, ”புத்தாண்டில் புதிதாக எதாவது செய்ய வேண்டும் என்று ரொம்ப சாதாரணமாக எடுத்த போட்டோ ஷூட்தான் இது. இதுவரை நான் போட்டோ ஷூட்டே எடுத்ததில்லை. இதுதான் முதல் முறை.
இந்த போட்டோக்களை என் திரையுலக நண்பர்களுக்கு அனுப்பி வைத்தேன். ஆனால், நானே எதிர்பார்க்காத அளவுக்கு என் புதிய கெட்டப் புகைப்படங்களை மக்கள் வைரலாக்கி வருகிறார்கள். சில மணி நேரங்களில் பல லட்சம் லைக்குகளை பெற்றிருப்பதாக கூறுகிறார்கள்.
எனது இந்தப் புதிய முயற்சிக்கு மக்கள் இவ்வளவு பெரிய ஆதரவு கொடுத்தது மிகவும் சந்தோஷமாக இருக்கிறது. இயக்குநர்கள் பலர் தொலைபேசி மூலம் வாழ்த்து தெரிவித்து வருவதோடு, திரைப்படங்களிலும் உங்களை வேறு மாதிரி காட்டணும் என்று கூறுகிறார்கள்.
இது என் பல நாள் கனவு. காமெடி கதாப்பாத்திரங்களில் மட்டும் அல்லாமல், அனைத்து வேடங்களிலும் நடிக்க நான் ரெடியாக இருக்கிறேன். எனது இந்த ஆசையை இந்த போட்டோ ஷூட் வெளியுலகிற்கு தெரியப்படுத்தியிருப்பது இரட்டிப்பு மகிழ்ச்சியாக இருக்கிறது.
இயக்குநர்கள் ஆனந்த் சங்கர், பி.எஸ்.மித்ரன் உள்ளிட்டவர்கள் என்னை பார்க்கும் போதெல்லாம், “சார் உங்களை காமெடி நடிகராக இல்லாமல், வேறு ஒரு வேடத்தில் காட்டணும் சார்” என்று சொல்வார்கள். இந்தப் புகைப்படங்கள் அதை நிஜமாக்கியுள்ளது.
எனவே, இந்த புத்தாண்டில் எனது சினிமா வாழ்க்கையில் புது திருப்பம் ஏற்படும் என்ற நம்பிக்கை ஏற்பட்டுள்ளது. காமெடி வேடத்தில் மட்டும் இன்றி, எந்த வேடமாக இருந்தாலும் நடிக்க ரெடி. அப்பா, அண்ணன் உள்ளிட்ட குணச்சித்திர வேடங்களிலும் ஒரு கலக்கு கலக்கப் போகிறேன்…” என்று புத்துணர்ச்சியுடன் கூறினார்.
