ரியல் எஸ்டேட் மோசடிகளைப் பற்றிப் பேசி, அதன் அநீதிகளைத் தோலுரிக்கிற படமாக ‘உன்னால் என்னால்’ உருவாகியுள்ளது.
ஸ்ரீஸ்ரீகணேஷா கிரியேஷன்ஸ் நிறுவனத்தின் சார்பில் தயாரிப்பாளர் ராஜேந்திரன் சுப்பையா இந்தப் படத்தைத் தயாரித்துள்ளார். கெளதம் ராஜேந்திரன் வெளியிடுகிறார்.
இப்படத்தில் ஜெகா, கே.ஆர்.ஜெயகிருஷ்ணா, உமேஷ் மூவரும் நாயகர்களாக நடித்துள்ளார்கள். இதுவரையிலும் கதாநாயகியாக நடித்து வந்த சோனியா அகர்வால் இந்தப் படத்தில் வில்லியாக எதிர்மறைக் கதாபாத்திரத்தில் மிரட்டி உள்ளார்.
மேலும் ரவி மரியா, ராஜேஷ், டெல்லி கணேஷ், ஆர்.சுந்தர்ராஜன், மோனிகா, நெல்லை சிவா, சஹானா, நிஹாரிகா, லுப்னா அமீர் ஆகி யோரும் நடித்துள்ளனர்.
ஒளிப்பதிவு – கிச்சாஸ், இசை – ரிஸ்வான், கலை இயக்கம் – விஜய் ராஜன், படத் தொகுப்பு – எம்.ஆர்.ரஜீஷ், நடன இயக்கம் – கௌசல்யா, சண்டை இயக்கம் – பில்லா ஜெகன், இயக்க மேற்பார்வை – சிங்கப்பூர் ரவீந்திர சிம்மன், எழுத்து, இயக்கம் – ஏ.ஆர்.ஜெய கிருஷ்ணா.
வறுமையின் காரணமாகக் கிராமத்தில் இருந்து பிழைப்பு தேடி மூன்று இளைஞர்கள் சென்னை வருகிறார்கள். பணத் தேவை அவர்களைத் துரத்த, ஒரு வழியாக அவர்களின் பணத் தேவை தீர்ந்து போகும் ஒரு வாய்ப்பு வருகிறது. ஆனால் அந்த வாய்ப்புக்குப் பின்னணியில் ஓர் அநீதி இருப்பதைக் காண்கிறார்கள்.
அது இவர்களை மனசாட்சிக்கு எதிராக தவறாகப் பயன்படுத்தும் நபரின் வாய்ப்பு என்று தெரிகிறது. அந்தத் தருணத்தில் தங்கள் வறுமையைப் போக்க சமரசப் பட்டார்களா? அல்லது மனசாட்சி, மனித நேயம்தான் முக்கியம் என்று முடிவு எடுத்தார்களா? என்பதைப் பற்றிப் பேசும் படம்தான் இந்த ‘உன்னால் என்னால்’ திரைப்படம்.
இந்தப் படம் குறித்து இயக்குநர் ஏ.ஆர்.ஜெயகிருஷ்ணா பேசும்போது, “உலகமே எந்திரமயமாகிவிட்ட இக்காலச் சூழலில் மனிதன் பணத்தைத் தேடி ஓடுகிறான். பணத்திற்காக எந்த விதமான அநீதிகளையும் செய்யத் தயாராக இருக்கிறான்.
அப்படிப் பெரிய அநீதி இழைக்கும் ஒரு துறையாக ரியல் எஸ்டேட் துறை உள்ளது. இதில் இழப்புகளையும், ஏமாற்றங்களையும் சந்தித்தவர்கள் பலர் உண்டு. இடைத் தரகர்களைக் கொண்டு சக மனிதரை எப்படி அதில் ஏமாற்றுகிறார்கள்.. தங்கள் சதி வலையில் சிக்கிக் கொண்டவர்களின் வாழ்க்கையை எப்படி நாசமாக்குகிறார்கள் என்பதை இந்தப் படத்தில் கூறி இருக்கிறோம்.
உலகளவில் விஸ்வரூபம் எடுத்திருக்கும் இந்த ரியல் எஸ்டேட் உலகத்தின் கறுப்புப் பக்கங்களை இதில் புரட்டிக் காட்டியிருக்கிறோம்.மனிதன் எவ்வளவு சாதித்தாலும் தனது மனசாட்சிக்கு உட்பட்டு மனிதநேயத்தோடு வாழ்வதுதான் சிறந்த அறம் என்று இப்படத்தில் கூறி இருக்கிறோம்.
அது இக்கால பணம் தொடர்பான மனித மனங்களின் பணமா? பாவமா? சுயநலமா? மனசாட்சியா? என்கிற ஊசலாட்டங்களுக்குப் பதில் கூறும் ஒரு தீர்வாக இருந்து படம் பார்க்கும் ரசிகர்களை நல்வழிப்படுத்தும்…” என்றார்.
ஆக்ஷன் ரியாக்ஷன் நிறுவனத்தின் சார்பில் விநியோகஸ்தர் ஜெனீஷ் இந்தப் படத்தை தமிழகம் முழுவதும் திரையிடுகிறார்.
இந்த ‘உன்னால் என்னால்’ படம் வரும் ஜூன் 2-ம் தேதி வெளியாக உள்ளது.
