விரைவில் வெளிவர உள்ள ‘டார்லிங்-2’ படத்தில் தன்னுடைய சிறப்பான நடிப்பால் பலரது பாராட்டையும் பெற்றுள்ளவர் ரமீஸ் ராஜா. இவருடைய அடுத்த படம் ‘உல்ட்டா’.
அழகான இளம் நடிகரான ரமீஸ் ராஜா தன்னுடைய முதல் படம் வெளிவருவதற்கு முன்பே அடுத்த படத்தில் நடிக்கும் வாய்ப்பைப் பெற்றதில் மகிழ்ச்சியாக உள்ளார்.
இது பற்றி பேசும் நடிகர் ரமீஸ் ராஜா, “இந்த நல்ல விஷயம் ‘டார்லிங் 2’ படத்தால்தான் நடைபெற்றுள்ளது. இப்படத்தின் இசை வெளியீடு நடப்பதற்கு முன்பாகவே இது நடக்க ஸ்டுடியோ க்ரீன் நிறுவனத்தின் பெயரும், தயாரிப்பாளர் ஞானவேல்ராஜாவும்தான் காரணம்.
‘டார்லிங் 2’ விரைவில் வெளியாக உள்ளது. இந்த வெளியீட்டிற்குக் காத்திருக்கும்போதே ‘உல்ட்டா’ படத்தின் கதை என்னைக் கவர்ந்து விட்டது. இயக்குநர் ஏ.ஆர்.முருகதாசின் அசோசியேட் இயக்குநரான விஜய் பாலாஜி, எழுத்தாளர் பாலகிருஷ்ணனுடன் இணைந்து இந்த வித்தியாசமான கதையை உருவாக்கியுள்ளார். இந்தப் படம் மூலம் இயக்குனராகவும் அறிமுகமாகிறார் விஜய் பாலாஜி.
ரிட்ஸ் மீடியாக ஒர்க்ஸ் நிறுவனம் இந்த ‘உல்ட்டா’ படம் மூலம் திரையுலகத்தில் அடியெடுத்து வைக்கிறது. இதில் ஜனனி ஐயர் நாயகியாக நடிக்கிறார். இந்தப் படம் அவருடைய நடிப்புத் திறமையை ரசிகர்களுக்கு உணர்த்தும்.
இந்தக் கதைக்கு ‘உல்ட்டா’ என்பது கண்டிப்பாக பொருத்தமான தலைப்பாகத்தான் இருக்கும். ஒரு இளைஞனின் வாழ்க்கையில் தினமும் நடக்கும் விஷயங்கள் எப்படி மாறுகிறது என்பதுதான் படத்தின் கதை. இதன் திரைக்கதை மிகவும் நகைச்சுவை உணர்வுடன் வடிவமைக்கப்பட்டுள்ளது.
சைக்காலஜிக்கல் காமெடியில் ஒரு புதிய வகைப் படமாக இந்தப் படம் அமையும். ரசிகர்களை முழுவதுமாக ஈர்க்கும்விதத்தில் இந்தப் படம் இருக்கும். இம்மாதக் கடைசியில் இதன் படப்பிடிப்பு ஆரம்பமாக உள்ளது..” என்கிறார் ரமீஸ் ராஜா.
