full screen background image

மத்திய, மாநில அரசுகளிடம் தமிழ்த் திரையுலகம் வைத்துள்ள கோரிக்கைகள்..!

மத்திய, மாநில அரசுகளிடம் தமிழ்த் திரையுலகம் வைத்துள்ள கோரிக்கைகள்..!

நடிகர் விஷால் தலைமையில் தமிழ்நாடு திரைப்பட கூட்டமைப்பினர் பத்திரிகையாளர்களை சந்தித்தனர்.

அப்போது சில நாட்களாக அவர்களுக்குள் நடந்த விவாதங்களின் அடிப்படையில் மத்திய, மாநில அரசுகளுக்கு தமிழ் திரைப்பட உலகின் சார்பில் சில கோரிக்கைகளை முன் வைத்தார்கள்.

அந்தக் கோரிக்கைகளின் விவரம் :

மத்திய அரசுக்கு எங்களது கோரிக்கைகள் :

1. GST என்கிற புதிய வரிக் கொள்கையில் மிகவும் பாதிப்புக்கு உள்ளாகி இருப்பது எங்கள் திரைப்பட துறையே.

2. திரைப்படம் தயாரிப்பது என்பது ஒரு கலை. ஒரு படைப்பு. அப்படி தயாராகி மக்கள் பார்வைக்கு செல்லும்போது மட்டுமே அங்கு வணிகம் என்கிற நிலை வருகிறது. எனவே திரைப்படம் முழுமையாகி வெளியிட தயாராகும்வரை மிகவும் குறைந்தபட்ச வரி விதிப்பாக 4  அல்லது 5 சதவிகிதம் மட்டுமே GST-யாக இருக்க வேண்டும்.

3. திரையரங்குகளில் திரைப்படம் வெளியிடும்போது தமிழ் திரைப்படங்களுக்கு குறைவாக GST பிற மொழி படங்களுக்கு அதிகமாக GST என விதிக்கப்படவேண்டும்.

4. மத்திய அரசு புதிய மற்றும் உரிமை இல்லாத திரைப்படங்களை பதிவேற்றம் செய்பவர்கள் மற்றும் பதிவிறக்கம் செய்பவர்கள் இதே தொழிலாக செய்து கொள்ளையடிக்கும் தொலைபேசி  மற்றும் இணைய சேவை நிறுவனங்களை உடனடியாக தடை செய்ய வேண்டும். மத்திய அரசாங்கம் இதற்காக தனி கண்காணிப்பு குழு அமைக்க வேண்டும்.

5. புதிய திரையரங்குகளுக்கு 5 வருடம் GST மற்றும் பலவித வரிகளில் இருந்து முழு விலக்கு அளிக்க வேண்டும்.

6. திரைப்பட தொழிலையும் அரசாங்கம் அங்கீகரிக்கப்பட்ட தொழிலாக நினைத்து மற்ற தொழில் செய்வோருக்கு இருக்கும் அனைத்து வசதிகளையும் மரியாதையையும் அளிக்க வேண்டும். இது எங்கள் 75 வருட கோரிக்கை.

மாநில அரசுக்கு எங்களது கோரிக்கைகள் :

1. திரையரங்கு கட்டண முறையில் பெரும் மாற்றங்கள் கொண்டு வர வேண்டிய காலம் இது. திரையரங்குகளின் தன்மை, இருக்கும் இடம், ரசிகர்களுக்கு தரும் வசதிகள், பண்டிகை நாட்கள் மற்றும் வார இறுதி நாட்களில் சிறப்பு கட்டணம் என பலவகை மாற்றங்கள் கொண்டு வர அரசு எங்களுக்கு ஒத்துழைக்க வேண்டும்.

2. திருட்டு வி.சி.டி ஒழிப்பில் மாநில அளவில் காவல்துறையின் சிறப்பு தடுப்பு பணியில் குறைந்தபட்சம் 1000 நபர் கொண்ட டீம் அமைக்கப்பட வேண்டும். இப்போது இருக்கும் 96 நபர்கள் கொண்ட டீம் போதவில்லை.

3. திரைப்பட துறையினரே இந்த பைரசி தடுப்புக்கு என ஒரு அணி அமைத்து போராட அரசாங்கம் அனுமதி வழங்க வேண்டும்.

4. அரசு கேபிள் தலைமையில் உள்ள கேபிள் டி.வி ஆபரேட்டர்களும் மற்றும் சில தனியார் கேபிள் டிவி தலைமையில் உள்ள கேபிள் டிவி ஆபரேட்டர்கள் எங்கள் திரைப்படங்களை முழுமையாகவும் சில காட்சிகளாகவும், பாடல் காட்சிகளாகவும் 24 மணி நேரமும் தொடர்ந்து ஒளிபரப்பும் கொடுமை நிகழ்ந்து வருகிறது. இதை இரும்பு கரம் கொண்டு அரசு அடக்க வேண்டும்.

5. உரிமம் இன்றி திரைப்படங்கள் மற்றும் காட்சிகள் ஒளிபரப்பும் பேருந்துகள் அனைத்திற்கும் அவற்றின் தொழில் உரிமமே ரத்து ஆகும் வகையில் அரசு ஆணை பிறப்பிக்க வேண்டும்.

6. ஒரே இடத்தில் இரு திரையரங்குகள் இருப்பின் அவற்றை ‘Multiplex’ என்ற பெயரிலேயே கருத வேண்டும்.

7. ஒரு திரையரங்கு உள்ள இடத்தில் இரண்டு அல்லது மூன்று சிறிய திரையரங்குகளாக மாற்றிக் கொள்ளும் உரிமை உரிமையாளர்களுக்கு தரப்பட வேண்டும். அதற்கான அனுமதிகள் எளிமையாக்கப்பட வேண்டும்.

8. இந்த துறையின் உடனடி வளர்ச்சிக்கு சிறிய அரங்குகள் (மினி தியேட்டர்) மாநிலம் முழுவதும் கட்டப்படவேண்டும். இதற்கான அனுமதி முறைகள் எளிதாக்கப்பட வேண்டும். மேலும் திரையரங்குகள் புதிதாக அமைக்கவும் புதுப்பித்துக் கொள்ளவும் அனுமதி, விண்ணப்பம் ஆகியவை 60 நாட்களில் வழங்கப்பட வேண்டும். (தெலுங்கானா அரசு இதனை சிறப்பாக அமுல்படுத்தியுள்ளது.)

இப்படி மத்திய, மாநில அரசுகளுக்கு வகைப்படுத்தி தங்களது கோரிக்கைகளை முன் வைத்துள்ளார்கள் திரையுலகத்தினர்.

Our Score