இந்திய திரைப்பட வரலாற்றில் வியத்தகு மாற்றங்களை தந்த இயக்குநர் ராம் கோபால் வர்மா சமீப வருடங்களாக கிளாமரையும், செக்ஸையும் அடிப்படையாக வைத்தே படங்களை உருவாக்கி வருகிறார். அந்த வரிசையில் அவருடைய லேட்டஸ்ட் தெலுங்கு திரைப்படம் ‘டேஞ்சரஸ்’.
தற்போது இந்தப் படம் தமிழில் ‘காதல் காதல்தான்’ என்ற பெயரில் வெளியாகவுள்ளது.
ஆண்களை வெறுக்கும் இரு பெண்களுக்குள் காதல் வர, தங்களது தன் பாலின காதலைக் காப்பாற்றிக் கொள்ள அவர்கள் போராடுவதே இந்தப் படம். இந்தியாவின் முதல் லெஸ்பியன் க்ரைம் திரில்லராக இப்படம் உருவாகியுள்ளது.
Artsee Media / Rimpy Arts International ஆகிய நிறுவனங்கள் இணைந்து இப்படத்தை தயாரித்துள்ளன.
இப்படத்தில் நைனா கங்குலி, அப்சரா இருவரும் முதன்மை பாத்திரங்களில் நடித்துள்ளார்கள். ராஜ்பால் யாதவ், காஸி, மிதுன் புரந்தாரி முக்கிய பாத்திரங்களில் நடித்துள்ளனர்.
இந்தி மொழியில் தயாரான இப்படம் வரும் ஏப்ரல் 8-ம் தேதி, தமிழ், தெலுங்கு ஆகிய மொழிகளிலும் வெளியாகிறது.
தமிழ்ப் பதிப்பின் முன் வெளியீட்டை ஒட்டி இயக்குநர் ராம் கோபால் வர்மா மற்றும் படத்தில் நாயகிகளாக நடித்திருக்கும் நைனா கங்குலி, அப்ஷரா ஆகியோர் இன்று காலை சென்னை, கிரீன் பார்க் ஹோட்டலில் பத்திரிக்கையாளர்களை சந்தித்தனர்.
இந்நிகழ்வில் நாயகி நைனா கங்குலி பேசும்போது, “ராம் கோபால் வர்மா சாருக்கு நன்றி, என் மீது நம்பிக்கை வைத்து என்னை தெலுங்கு படத்தில் அறிமுகப்படுத்தினார். இப்போது புதுமையான முயற்சியான இந்தப் படத்திலும் நடிக்க வைத்துள்ளார்.
இந்த மாதிரி கதையை எடுப்பது மிகவும் கடினம். வழக்கமாக நாயகன், நாயகி காதலிப்பார்கள். ஆனால், இதில் இரண்டு பெண்கள் காதலிக்கிறார்கள். இதில் நடிப்பது எனக்கு மிகுந்த சவாலாக இருந்தது.
இந்தப் படத்தின் படப்பிடிப்பினை ஆரம்பித்தபோது, “நான் ஆண் போல் நடிக்க வேண்டும்…” என்றார் இயக்குநர். அதற்காக நான் சில பயிற்சிகளை மேற்கொண்டேன், ஆண்களின் உடல் மொழிகளை பார்த்து சிலவற்றைக் கற்றுக் கொண்டு நடித்திருக்கிறேன்.
இங்கு லெஸ்பியன் உறவு குற்றமாக பார்க்கப்படுகிறது. ஆனால் அது அவர்கள் குற்றம் இல்லை. அது ஹார்மோன் சம்பந்தப்பட்டது. அவர்களின் கதையைச் சொல்லும் இந்தப் படத்தில் நடித்ததற்காக நான் மிகவும் மகிழ்ச்சியடைகிறேன்…” என்றார்.
நாயகி அப்ஷரா பேசும்போது, “இந்தக் ‘காதல் காதல்தான்’ படம் மூலம் நான் தமிழ்த் திரையுலகத்தில் அறிமுகமாவது மிகவும் உற்சாகம் அளிக்கிறது.
இங்கு இப்படத்திற்கு கிடைத்திருக்கும் வரவேற்பு எனக்கு மிகவும் மகிழ்ச்சியை அளிக்கிறது. தெலுங்கு, தமிழில் இந்தப் படம் வெளியாவது மிக்க மகிழ்ச்சி.
இந்தப் படம் ஓரின சேர்க்கையாளர்கள் பற்றியது. இது நம் சமூகத்தில் குற்றமாக பார்க்கப்படுகிறது. ஓரின சேர்க்கையாளர்கள் குற்றவாளிகள் அல்ல; அவர்களும் கடவுளின் குழந்தைகள்தான். இதில் இரண்டு பெண்களுக்கிடையேயான உண்மையான காதல் இருக்கிறது. பார்வையாளர்கள் அவர்களின் காதலை புரிந்து கொள்வார்கள் என நம்புகிறேன்.
இது கமர்ஷியல் படமும்கூட. இரண்டு ஹிரோயின்களுக்கிடையே டூயட் சாங் இருப்பது இந்திய சினிமாவிலேயே இதுவே முதல் முறை. ஒரு புதுமையான படத்தில் நான் இருப்பதில் எனக்கு மகிழ்ச்சிதான்…” என்றார்.
இயக்குநர் ராம் கோபால் வர்மா பேசும்போது, “இந்தப் படத்தின் ஐடியா எனக்கு வந்ததே ஒரு வித்தியாசமான அனுபவம். ஓரின சேர்க்கையாளர்களை நாம் பரிதாபமாகத்தான் பார்க்கிறோம். அரசாங்கமே அனுமதி அளித்தாலும் நம் பார்வை மாறுவதில்லை.
ஒரு காதல் ஜோடியை வைத்து நிறைய க்ரைம் திரில்லர் கதைகள் வந்துள்ளது. அதை மாற்றலாம் என்றுதான் இதை எழுதினேன். இரண்டு இளம் பெண்கள் ஏன் லெஸ்பியன் உறவுக்கு செல்கிறார்கள்? அவர்களை சமூகம் எப்படி பார்க்கிறது? அவர்களின் பிரச்சனை என்ன? என்று யோசிக்கும்போது அதனை மையமாக வைத்து இதை உருவாக்கலாம் என்று இப்படத்தை எடுத்தோம்.
நைனா கங்குலி, அப்சரா இருவருக்கும், அவர்களின் தைரியத்திற்கும் நன்றி. அவர்களால்தான் இப்படம் சாத்தியமானது. முதலில் நைனா கங்குலி இதற்கு தயங்கினார். அவருக்கு ஐடியா பிடித்திருந்தது. ஆனாலும் அவருக்குள் ஒரு தயக்கம் இருந்தது. அதன் பிறகு ஒப்புக் கொண்டார். இதைப் படமாக்குவதில் நிறைய சவால்களும் இருந்தன.
இரண்டு ஹிரோயின்களை வைத்து டூயட் பாடல் எடுப்பதே இந்திய சினிமாவில் வித்தியாசம்தான். இந்தப் படம் அனைத்து மொழி ரசிகர்களுக்கும் நிச்சயமாகப் பிடிக்கும் என்றே நினைக்கிறேன்…” என்றார்.
குரபரன் இண்டர்நேஷனல் நிறுவனம் தமிழகத்தில் இப்படத்தை வெளியிடுகின்றனர். ஏப்ரல் 8-ம் தேதி முதல் உலகமெங்கும் திரையரங்குகளில் வெளியாகிறது.
