நடிகரும், இயக்குநருமான ராதாகிருஷ்ணன் பார்த்திபனின் ‘ஒத்த செருப்பு சைஸ்-7’ திரைப்படம் இந்தோனேஷியாவின் பஹாசா மொழியில் மொழி மாற்றம் செய்யப்படுகிறது. இந்தப் பெருமையைப் பெரும் முதல் தமிழ்ப் படம் இதுவாகும்.
புகழ் பெற்ற பன்முக ஆளுமையான ராதாகிருஷ்ணன் பார்த்திபனின் அற்புதமான முயற்சியில் உருவான, ‘ஒத்த செருப்பு சைஸ்-7’ படம் தமிழ்த் திரைப்பட வரலாற்றில் ஒரு முன் உதாரணப் படமாக மாறியுள்ளது.
இந்திய மற்றும் உலகளாவிய தளங்களின் பார்வையாளர்களின் இதயங்களை கவர்ந்தது முதல், அகாடமி விருதுகள் மற்றும் பல்வேறு சர்வதேச திரைப்பட விழாக்களின் நடுவர்களில் கவனத்தை ஈர்த்ததுவரை, பல சாதனைகள் படைத்த இந்த தலை சிறந்த படைப்பு, தற்போது தமிழ் சினிமாவின் களத்தை மேலும் விரிவுபடுத்தி இருக்கிறது.
இந்த ‘ஒத்த செருப்பு சைஸ்-7’ திரைப்படம் தற்போது அதிகாரப்பூர்வமாக இந்தோனேசியாவின் பஹாசா மொழியில் ரீமேக் செய்யப்படுகிறது, இதை P.T.ஃபால்கன் நவீன் தயாரிக்கிறார். இந்தோனேசியாவில் ரீமேக் செய்யப்படும் முதல் தமிழ்த் திரைப்படம் இதுதான் என்பது குறிப்பிடத்தக்கது.
இயக்குநர் ராதாகிருஷ்ணன் பார்த்திபன், அமிதாப்பச்சன் தயாரிப்பில், அபிஷேக்பச்சன் கதாநாயகனாக நடிக்கும் இந்தப் படத்தின் இந்தி ரீமேக்கின் படப்பிடிப்பை தற்போது முடித்துள்ளார்.
