full screen background image

துல்கர் சல்மானின் படங்களுக்கு கேரளாவின் தியேட்டர் அதிபர்கள் சங்கம் தடை..!

துல்கர் சல்மானின் படங்களுக்கு கேரளாவின் தியேட்டர் அதிபர்கள் சங்கம் தடை..!

மலையாளத் திரையுலகத்தின் சூப்பர் ஸ்டார் நடிகரான மம்மூட்டியின் மகனான நடிகர் துல்கர் சல்மானுக்கு எதிர்காலத்தில் தொழில் ஒத்துழைப்பு தருவதில்லை என்று மலையாள சினிமாவின் தியேட்டர் அதிபர்கள் சங்க கூட்டமைப்பு தெரிவித்துள்ளது.

துல்கர் சல்மான் நடிப்பில் உருவான ‘சல்யூட்’ திரைப்படத்தை திரையரங்குகளுக்குத் தருவதாகச் சொல்லி ஒப்பந்தமும் செய்து கொண்டு கடைசியாக அந்த ஒப்பந்தத்தை முறித்துக் கொண்டு ஓடிடி தளத்தில் அந்தப் படத்தை துல்கர் சல்மான் திரையிட்டதால் இந்த முடிவு எடுக்கப்பட்டதாக அந்த அமைப்பு தெரிவித்துள்ளது.

ரோஷன் ஆண்ட்ரூஸ் இயக்கத்தில் உருவாகியிருந்த இந்த ‘சல்யூட்’ திரைப்படம் ஏற்கெனவே ஜனவரி 14-ம் தேதியன்று திரையரங்குகளில் வெளியாவதாக அறிவிக்கப்பட்டிருந்தது. ஆனால் அப்போது கேரளாவில் ‘ஓமைக்ரான் வைரஸ்’ பரவல் அதிகமாக இருந்ததால் தியேட்டர்கள் மூடப்பட்டன. இதனால் இந்தப் படத்தின் திரையிடலும் பாதிக்கப்பட்டது.

இதையடுத்து மீண்டும் பிப்ரவரி 14-ம் தேதியன்று படத்தைத் தியேட்டர்களுக்குக் கொண்டு வர முடிவு செய்யப்பட்டது. ஆனால் அப்போது துல்கர் சல்மானின் அலுவலக ஊழியர்கள் பலரும் ஓமைக்ரான் வைரஸ் பரவலால் பாதிக்கப்பட்டதால் அப்போதும் படம் வெளியாக முடியவில்லையாம்.

மார்ச் 31-ம் தேதிக்குள்ளாக ஓடிடியில் வெளியாக வேண்டும் என்று ‘சோனி லிவ்’ ஓடிடி தளத்துடன் முன்பேயே ஒப்பந்தம் செய்திருந்ததால் வேறு வழியில்லாமல் இப்போது ஓடிடியில் படத்தை வெளியிட்டதாக துல்கர் சல்மானின் அலுவலகச் செய்தித் தொடர்பாளர் தெரிவித்துள்ளார்.

துல்கர் சல்மானின் சொந்தத் தயாரிப்பு நிறுவனமான Wayfarer Films ஏற்கெனவே தயாரித்திருந்த ‘குரூப்’, மற்றும் ‘உபாசரபூர்வம் குண்டா ஜெயன்’ ஆகிய படங்களும் ஓடிடியில்தான் வெளியாகியிருந்தன.

இது குறித்து கேரள மாநில தியேட்டர் உரிமையாளர்கள் சங்கக் கூட்டமைப்பின் தலைவரான விஜயகுமார் பேசுகையில், “ஓடிடியினால்தான் தாங்கள் வாழ்வதாக நட்சத்திர நடிகர்கள் நினைத்தால் அவர்கள் அந்த வழியிலேயே போகட்டும். நாங்கள் தடை போடவில்லை.

எங்களுக்கு அனைத்து நடிகர்களும் ஒன்றுதான். மோகன்லால், பிருத்விராஜ் உள்ளிட்ட சிலரின் படங்களும் ஓடிடியில் வெளியாகியுள்ளன. அப்போது தியேட்டர்கள் மூடப்பட்டு, பாதி டிக்கெட்டுகளுக்கு மட்டுமே அனுமதியிருந்ததால் அவர்கள் ஓடிடிக்குக் கொடுத்தார்கள்.

இப்போதும் இதையே தொடர்ந்தால் நிச்சயமாக மோகன்லாலின் படங்களையும் எதிர்காலத்தில் நாங்கள் எங்களது தியேட்டர்களில் திரையிட மாட்டோம். இது அவர்களுக்கான தடை இல்லை. வாழ்வாதாரத்திற்காக தியேட்டர்காரர்களாகிய நாங்கள் போராடி வரும் சூழலில், எங்களைக் காப்பாற்றிக் கொள்ள நாங்கள் எடுக்கும் தற்சார்பு நடவடிக்கைதான் இது..” என்று கொதிப்புடன் பேசியுள்ளார்.

Our Score