நூற்றுக்கும் மேற்பட்ட படங்களை விநியோகம் செய்ததுடன், சங்கிலி தொடர்களாக தியேட்டர்களையும் நடத்தி வந்த பிரபல விநியோகஸ்தர் A.வெற்றிவேல் தனது ‘வெற்றிவேல் 576 மெகா பிக்சர்ஸ் பட நிறுவனம்’ சார்பாக தயாரித்துள்ள படம் ‘நாய்க்குட்டி படம்.’
இதில் டோனி என்ற ஆண் நாய்க்குட்டி, ஜீனோ என்ற பெண் நாய்க்குட்டி நாயகன், நாயகியாக நடித்திருக்கிறார்கள். காதலர்களாக நிதின் சத்யா, ஸ்ருதி ராமகிருஷ்ணன் நடித்துள்ளார்கள். மற்றும் எம்.எஸ்.பாஸ்கர், டெல்லி கணேஷ், மகாநதி சங்கர், பொன்னம்பலம், வாசு விக்ரம், வையாபுரி, ஜெயமணி, போண்டாமணி, கிங் காங், சிசர் மனோகர், அழகு, வாமன் மாலினி, ரவிராஜ் ஆகியோரும் நடித்துள்ளனர்.
ஒளிப்பதிவு – ஆனந்த், இசை – ஜெய.கே.தாஸ், பாடல்கள் – மலை மன்னன், கலை – பாபு, நடனம் – ஷெரீப், சண்டை பயிற்சி – நாக் அவுட் நந்தா, படத் தொகுப்பு – மாரீஸ் ஜி.வெங்கடேஷ், தயாரிப்பு நிர்வாகம் – தண்டபாணி, தயாரிப்பு மேற்பார்வை – வெங்கட், கதை, திரைக்கதை, வசனம், இயக்கம் – ரங்கா. இவர் இயக்குநர்கள் S.D. ரமேஷ் செல்வன், சித்திரைசெல்வன், எல்.ஜி.ரவிசந்தர் ஆகியோரிடம் உதவியாளராகப் பணியாற்றியவர்.
படம் பற்றி இயக்குநர் ரங்கா பேசும்போது, “இப்போதெல்லாம் மக்கள் ஒரே மாதிரியான கதைகளை விரும்புவதில்லை.. ஏதாவது புதிதாக எதிர்பார்க்கிறார்கள். அதற்காக யோசித்ததுதான் இந்தக் கதை.
நிதின் சத்யா வளர்க்கும் நாய் டோனி.. ஸ்ருதி ராமகிருஷ்ணன் வளர்க்கும் நாய் ஜீனோ. திடீரென்று டோனி காணாமல் போய் விடுகிறது. டோனியை தேடி நிதின் சத்யா ஒரு பக்கம் அலைகிறார். இன்னொரு பக்கம் நான்கு திருடர்கள்.. அத்துடன் அரசியல்வாதிகள் இருவர்.. இப்படி ஆளாளுக்கு அந்த நாயை ஏன் தேடுகிறார்கள் என்பதுதான் திரைக்கதை சுவாரஸ்யம்.
இதற்காக பக் இனத்து நாய்களை விலை கொடுத்து வாங்கினோம். அவைகளை படத்தில் நடிக்க வைப்பதற்காக ஆறு மாதங்கள் பழக்கப்படுத்தினோம். அதற்கு பிறகு தேவர் பிலிம்ஸின் நாய் பயிற்சியாளரான லாரன்ஸ் ஒரு வருடம் அவைகளுக்கு டிரெயினிங் கொடுத்தார்.
இந்த நாய்க் குட்டிகளுக்கு ஹீரோ, ஹீரோயினுக்கு நிகரான வசதிகளை ஏற்படுத்திக் கொடுத்தோம். இந்த நாய்கள் பிஸ்லரி வாட்டர்தான் குடிக்கும். சாதாரண நீரில் குளித்தால் முடி கொட்டிவிடும் என்பதால் கேன் வாட்டரில்தான் குளிக்க வைத்தோம்.. நல்ல விலையுயர்ந்த உணவு என்று ராஜமரியாதை செய்தோம்..!
இந்த படத்தில் நாய்களுக்கு திருமணம் செய்து வைத்து, அதற்கு முதலிரவையும் ஏற்பாடு செய்து வைத்து, ‘குட்டி குட்டி நாய்க்குட்டி சுட்டித்தனம் செய்யுது’ என்று டூயட்டும் வைத்திருக்கிறோம். முதல் ரீல் முதல் கடைசி ரீல்வரை நகைச்சுவைக்கு முக்கியத்துவம் கொடுத்து இந்தப் படத்தை உருவாக்கியுள்ளோம்…” என்றார் இயக்குநர் ரங்கா.
