பிப்ரவரி 17, 2017 அன்று இரவு 8 மணியளவில் எர்ணாகுளத்தில் நடிகர் பிருத்விராஜூடன் நடித்த ஒரு படத்தின் ஷூட்டிங்கில் கலந்து கொண்டுவிட்டு தன்னுடைய வீடு இருக்கும் திருச்சூரை நோக்கி தன்னுடைய காரில் சென்று கொண்டிருந்தார் அந்த நடிகை.
திருச்சூருக்கு முன்பாகவே நடிகையின் காரை மடக்கிய ஒரு கும்பல், அவரை அந்தக் காரிலிருந்து வலுக்கட்டாயமாக கடத்தி, தாங்கள் வந்த மினி வேனில் ஏற்றினார்கள். பின்பு அந்த வேனை ஓட்டிக் கொண்டேயிருக்கும்படி சொல்லிவிட்டு டிரைவரைத் தவிர மற்றைய 6 பேரும் அந்த வேனில் வைத்து அந்த நடிகையை பாலியல் பலாத்காரம் செய்தார்கள். அதோடு தாங்கள் செய்த பலாத்காரத்தை, தங்களது செல்போனில் பதிவும் செய்தார்கள்.
விடியற்காலை பொழுதில் நடிகைக்கு மிக நெருக்கமான, “அப்பா” என்று அழைக்கும் அளவுக்குப் பாசமான மலையாள சினிமாவின் மூத்த நடிகரான லாலின் வீட்டருகே அந்த நடிகையை இறக்கிவிட்டுவிட்டுச் சென்றுவிட்டார்கள்.
அந்த இருட்டில் உதவி கேட்டு தன் வீட்டுக் கதவைத் தட்டிய நடிகையைப் பார்த்து லாலின் குடும்பமே பதறிவிட்டது. போலீஸுக்குப் போகலாமா.. வேண்டாமா.. என்று தீவிர டிஸ்கஷன் செய்தபோது “புகார் கொடுத்தே தீர வேண்டும்” என்று உறுதியாய் இருந்தவர் அந்த நடிகைதான்.
விடியற்காலையில் முதல் வழக்காக இந்தப் புகார் போலீஸ் ஸ்டேஷனில் பதியப்பட்டது. செய்தி வெளியானவுடன் கேரள தேசமே அரண்டு போனது. மலையாளத் திரையுலகமும் திகைத்துப் போனது.
மறுநாளே, வாகன ஓட்டுநர் மார்ட்டின் ஆண்டனி கைது செய்யப்பட்டார்.
பிப்ரவரி 19-ம் தேதி கோவையில் சலீம் என்பவரும், பிரதீப்பும் கைது செய்யப்பட்டனர்.
பிப்ரவரி 20-ம் தேதி மணிகண்டன் பாலக்காட்டில் கைது செய்யப்பட்டார்.
பிப்ரவரி 23-ம் தேதி எர்ணாகுளம் கோர்ட்டில் சரணடைய வந்திருந்த சுனில் என்.எஸ். எனப்படும் பல்சர் சுனி கோர்ட்டுக்குள் வைத்தே கைது செய்யப்பட்டார். இதே நாளில் விஜூஸும் கைது செய்யப்பட்டார்.
பல்சர் சுனி முதல் குற்றவாளியாகப் பெயரிடப்பட்டார். அந்த மாத இறுதிக்குள், மேலும் நான்கு பேர் கைது செய்யப்பட்டனர்.
கடந்த ஆண்டு உச்ச நீதிமன்றம் ஜாமீன் வழங்கும்வரை பல்சர் சுனி 7 ஆண்டுகளுக்கும் மேலாக சிறையில் இருந்தார்.
ஏப்ரல் 18-ம் தேதி குற்றம்சாட்டப்பட்டவர்கள் மீது போலீஸ் குற்றப்பத்திரிக்கையை நீதிமன்றத்தில் தாக்கல் செய்தது.
சிறையில் இருந்த பல்சர் சுனி நடிகர் திலீப்புக்கு “நீங்கள் சொல்லித்தான் நான் இதைச் செய்தேன். எனக்கு இப்போது வக்கீல் வைப்பதற்குப் பணம் தேவையாய் இருக்கிறது. எப்படியாவது பணத்தை அனுப்பவும்” என்று கடிதம் அனுப்பியதாகச் சொல்லப்படுகிறது.
அந்தக் கடிதத்தை பல்சர் சுனியுடன் சிறைவாசியாக இருந்த ஒருவர்தான் எழுதியதாக சொல்கிறார்கள். இந்தக் கடிதத்தை வைத்துதான் போலீஸ், திலீப் மீது சந்தேகப்பட்டு அவரை வாட்ச் செய்து வந்தார்கள்.
ஏப்ரல் 20-ம் தேதி விஷ்ணு என்ற நபர் தன்னைத் தொடர்பு கொண்டு ஒன்றரை கோடி ரூபாய் கேட்டு மிரட்டியதாகப் புகார் அளித்தார் திலீப்.
இதற்கிடையில் இந்தக் கொடும் சம்பவத்தைக் கண்டித்து மலையாளத் திரையுலகம் சார்பில் நடத்தப்பட்ட கண்டனக் கூட்டத்தில் திலீப்பும் கலந்து கொண்டு அந்த பாலியல் பலாத்கார சம்பவத்தை வன்மையாகக் கண்டித்து பேசினார்.
ஜூன் 25-ம் தேதி திலீப்பை மிரட்டியதாக விஷ்ணு, சணல் என்ற இருவர் மீதும் போஸீஸார் வழக்குப் பதிவு செய்தனர்.
ஜூன் 28-ம் தேதி போலீஸ் திலீப்பை விசாரணைக்கு அழைத்தது. நள்ளிரவுவரையிலும் நடந்த விசாரணைக்குப் பின்பு திலீப் அப்போதைக்கு விடுவிக்கப்பட்டார்.
ஜூலை 2-ம் தேதி பல்சர் சுனி, திலீப்பின் மனைவி காவ்யா மாதவனின் பிளாட் வீட்டுக்கு கடந்த ஜனவரி மாதம் வந்து சென்றதாக போலீஸார் அறிந்தனர்.
திலீப் இதற்கிடையில் அமெரிக்காவுக்கு சென்று கலை நிகழ்ச்சி நடத்திவிட்டு நாடு திரும்பினார். இதற்கடுத்து அம்மா அமைப்பின் பொதுக்குழு ஜூலை 9-ம் தேதி நடந்தது. இந்தக் கூட்டத்தில் திலீப் கலந்து கொண்டார்.
இதற்கடுத்த நாள் ஜூலை 10-ம் தேதி இரவு 8 மணிக்கு திலீப் சிறப்பு போலீஸ் படையினரால் அவருடைய வீட்டில் வைத்து கைது செய்யப்பட்டார். 10 நாட்கள் போலீஸ் கஸ்டடியில் விசாரிக்கப்பட்ட திலீப், பின்பு ஆலுவா சப் ஜெயிலில் அடைக்கப்பட்டார்.
இந்த விசாரணைக்குப் பிறகு திலீப்தான் இந்தக் கடத்தல் வழக்கின் மாஸ்டர் மைண்ட் என்றும், திலீப் சொல்லித்தான் இவர்கள் இந்தக் குற்றச் செயலை செய்திருக்கிறார்கள் என்றது போலீஸ்.
திலீப் அந்த நடிகை மீது கொண்ட கோபத்துக்குக் காரணமாக போலீஸ் தரப்பில் கூறப்பட்ட காரணம்.. சில ஆண்டுகளுக்கு முன்பு, இப்போது பாதிக்கப்பட்ட நடிகை காவ்யா மாதவனுடன் தான் நெருங்கிய தொடர்பில் இருப்பதாக தனது மனைவி மஞ்சு வாரியரிடம் சொல்லி தனது குடும்பத்தில் குழப்பத்தை ஏற்படுத்தி விவாகரத்து நடக்க காரணமாக இருந்தார் என்பதுதான்.
ஜூலை 20-ம் தேதியன்று திலீப்பின் முதல் வக்கீலான பிரதீஷ் சாக்கோ ஆதாரங்களை அழித்தக் குற்றச்சாட்டில் கைது செய்யப்பட்டார்.
ஆகஸ்ட் 2-ம் தேதியன்று பிரதீஷ் சாக்கோவின் ஜூனியரான ராஜூ ஜோஸப் இதே குற்றச்சாட்டில் கைதானார்.
அக்டோபர் 3-ம் தேதியன்று திலீப் ஜாமீனில் விடுதலையானார்.
நவம்பர் 22-ம் தேதி கூடுதல் குற்றப்பத்திரிக்கை தாக்கலானது. இதில் 8-வது குற்றவாளியாக திலீப் சேர்க்கப்பட்டிருந்தார்.
குற்றம் சாட்டப்பட்டவர்கள் மீது இந்திய தண்டனைச் சட்டத்தின் பின்வரும் பிரிவுகளின் கீழ் குற்றம் சாட்டப்பட்டுள்ளது.
120B குற்றவியல் சதி;
109 குற்றத்திற்குத் தூண்டுதல்;
366 ஒரு பெண்ணைக் கடத்துதல் அல்லது கடத்துதல்;
354 பெண்ணின் அடக்கத்தை சீர்குலைக்கும் நோக்கத்துடன் அவளைத் தாக்குதல்;
354B பெண்ணின் ஆடையை களையும் நோக்கத்துடன் அவளை குற்றவியல் பலத்தைப் பயன்படுத்துதல்;
357 ஒரு நபரை தவறாக அடைத்து வைக்க குற்றவியல் பலத்தைப் பயன்படுத்துதல்;
376D கூட்டுப் பலாத்காரம்;
201 ஆதாரங்களை காணாமல் போகச் செய்தல்; மற்றும்
212 ஒரு குற்றவாளியை அடைத்து வைத்தல்; உடன் படிக்கவும்
34 பொதுவான நோக்கத்துடன் பல நபர்களால் செய்யப்பட்ட செயல்கள்.
தாக்குதல் காட்சிகளை சட்ட விரோதமாகப் படம் பிடித்து பரப்பியதாகக் கூறப்படும் குற்றச்சாட்டில் அவர்கள் மீது தகவல் தொழில் நுட்பச் சட்டம் 2008-ன் கீழ் குற்றம் சாட்டப்பட்டுள்ளது.
2018 மார்ச் 8-ம் தேதியன்று எர்ணாகுளம் கோர்ட்டில் விசாரணை துவங்கியது.
2018-ம் ஆண்டில், இந்த வழக்கின் விசாரணையை சிபிஐக்கு மாற்றக் கோரி திலீப் உயர் நீதிமன்றத்தில் மனு தாக்கல் செய்தார். மாநில காவல்துறை நடத்திய விசாரணை தனக்கு எதிராக ஒருதலைப்பட்சமாக இருப்பதாகக் கூறினார். ஒரு தனி நீதிபதி அவரது மனுவை தள்ளுபடி செய்தார்.
2019-ல் அவர் மேல்முறையீடு செய்தார், அது 6 ஆண்டுகளாக நிலுவையில் இருந்தது. 2025-ல் திலீப் மீண்டும் சிபிஐ விசாரணைக்கு அழுத்தம் கொடுக்க முடிவு செய்தார். இந்த ஆண்டு ஏப்ரல் மாதம், நீதிமன்றத்தின் ஒரு டிவிஷன் பெஞ்ச் மேல்முறையீட்டை தள்ளுபடி செய்தது.
2019-ம் ஆண்டில், பாதிக்கப்பட்டவர் இந்த வழக்கிற்கு ஒரு பெண் நீதிபதி வேண்டும் என்று கோரிக்கை வைத்ததையடுத்து, வழக்கு எர்ணாகுளம் மாவட்ட அப்போதைய கூடுதல் சிறப்பு அமர்வு நீதிபதி ஹனி எம்.வர்கீஸிடம் இந்த வழக்கு ஒப்படைக்கப்பட்டது.
குற்றம் சாட்டப்பட்டவர்களில் விஷ்ணு என்பவர் அப்ரூவராக மாறினார். வழக்கு விசாரணையின்போது வழக்கறிஞர் பிரதீஷ் சாக்கோ மற்றும் அவரது உதவியாளர் ராஜு ஜோசப் ஆகிய இருவர் விடுவிக்கப்பட்டனர்.
முழு விசாரணையும் இன்-கேமரா முறையில் (மூடிய கதவுகளுக்குப் பின்னால் வெளியாட்கள் அனுமதிக்கப்படாமல்) நடத்தப்பட்டது.
2020 ஜனவரி 30-ம் தேதி சாட்சிகள் விசாரணை துவங்கியது. ஆனாலும், பல்வேறு காரணங்களால் வழக்கு தாமதமானதற்கான பல சந்தர்ப்பங்களை மேற்கோள் காட்டி, விசாரணையை வேறு நீதிபதிக்கு மாற்ற அரசு தரப்பு அனுமதி கோரியது. சிறப்பு அரசு வழக்கறிஞர் ஏ.சுரேசன் தலைமையிலான அரசு தரப்பு, நீதிபதியின் சில அவதூறான கருத்துக்களுக்கு எதிர்ப்பு தெரிவித்தது. டிசம்பர் 2020-ல் சுரேசன் ராஜினாமா செய்தார்.
இருப்பினும், நவம்பர் 2020-ல், கேரள உயர் நீதிமன்றம் வழக்கு விசாரணையை மாற்றக் கோரி அரசு தரப்பு மற்றும் பாதிக்கப்பட்டவர் தாக்கல் செய்த மனுக்களை தள்ளுபடி செய்தது, மேலும் 2022-ல், பாதிக்கப்பட்ட நடிகை விசாரணையை வேறு நீதிபதிக்கு மாற்றக் கோரி தாக்கல் செய்த மற்றொரு மனுவை உச்ச நீதிமன்றம் தள்ளுபடி செய்தது.
டிசம்பர் 2021-ல், சுரேசனுக்குப் பதிலாக நியமிக்கப்பட்ட சிறப்பு அரசு வழக்கறிஞர் அனில் குமாரும் தனது பதவியை ராஜினாமாவை செய்தார். இந்த வழக்கை பின்னர் சிறப்பு அரசு வழக்கறிஞர் வி.அஜகுமார் கையாண்டார்.
விசாரணை நீதிமன்றம் மற்றும் கேரள உயர் நீதிமன்றத்தில் திலீப்பிற்காக மூத்த வழக்கறிஞர் பி.ராமன்பிள்ளையும், உச்ச நீதிமன்றத்தில் மூத்த வழக்கறிஞர் முகுல் ரோஹத்கியும் வாதிட்டனர்.
விசாரணையில் பல திருப்பங்கள் ஏற்பட்டன. இது தாமதத்திற்குக் காரணமாக இருக்கலாம். எனவே, விசாரணையை முடிப்பதற்கான காலக்கெடுவை நிர்ணயிக்க திலீப் உச்ச நீதிமன்றத்தை அணுகினார். அதேசமயம் கேரள அரசும் உச்ச நீதிமன்றத்தின் காலக்கெடுவை நீட்டிக்கக் கோரி உச்ச நீதிமன்றத்தை அணுகியது.
தாக்குதலின்போது பாதிக்கப்பட்டவரின் கருத்தை உறுதிப்படுத்தவோ அல்லது மறுக்கவோ டிஜிட்டல் சான்றுகள் போதுமானதாக இருக்கலாம் என்றாலும், திலீப்பின் நிலைமை இந்திய தண்டனைச் சட்டத்தின் பிரிவு 120B இன் கீழ் குற்றவியல் சதித் திட்டம் நிறுவப்பட்டதைச் சார்ந்துள்ளது. இங்குதான் சாட்சிகளின் சாட்சியம் முக்கிய பங்கு வகிக்கிறது.
மொத்தம் 261 சாட்சிகள் விசாரிக்கப்பட்டனர், அவர்களில் பலர் திரைப்படத் துறையைச் சேர்ந்தவர்கள். அவர்களில் 28 பேர் விசாரணையின்போது பல்டி அடித்தனர். அவர்கள் அளித்த ஆரம்ப வாக்குமூலங்கள், குறிப்பாக திலீப்பிற்கு எதிராக கூறியிருந்ததை அப்படி நாங்கள் சொல்லவே இல்லை என்று மறுத்துவிட்டனர்.
நடிகை பாமா மற்றும் நடிகர் சித்திக் ஆகியோர் திலீப் ஹோட்டலில் பாதிக்கப்பட்ட நடிகையை மிரட்டுவதைக் கண்ணால் கண்டதாக காவல்துறையிடம் தெரிவித்திருந்தனர், ஆனால் அவர்கள் நீதிமன்றத்தில் இதை மறுத்துவிட்டனர்.
நடிகர் எடவேலா பாபு அப்போது மலையாள திரைப்படக் கலைஞர்கள் சங்கத்தின் (AMMA) பொதுச் செயலாளராக இருந்தார். அவரும் தனது ஆரம்ப அறிக்கைகளில் இருந்து பின் வாங்கினார்.
2021 டிசம்பர் மாதம் இந்த வழக்கின் விசாரணை முடியும் தருவாயில் இருந்தபோது, திரைப்பட இயக்குனர் பாலச்சந்திர குமார் ஊடகங்களுக்கு ஒரு நேர்காணலை அளித்து, திலீப்புக்கும் சுனிக்கும் இடையிலான நெருங்கிய தொடர்பைக் குறிக்கும் சில ஆடியோ கிளிப்களை வெளியிட்டார்.
நடிகை தாக்குதல் வழக்கின் விசாரணையில் ஈடுபட்டிருந்த காவல்துறை அதிகாரிகளைக் கொல்ல சதித் திட்டம் தீட்டப்பட்டதை இந்த வீடியோ கிளிப்புகள் மற்றும் குமாரின் வாக்குமூலங்கள் வெளிப்படுத்தியதாகக் கூறப்படுகிறது.
இதன் விளைவாக திலீப் மற்றும் ஐந்து பேர் மீது புதிய எஃப்.ஐ.ஆர் பதிவு செய்யப்பட்டது. இந்த வழக்கில் திலீப் உள்ளிட்ட குற்றம் சாட்டப்பட்டவர்களுக்கு கேரள உயர் நீதிமன்றம் முன் ஜாமீன் வழங்கியது. இருப்பினும், எஃப்.ஐ.ஆரை ரத்து செய்ய மறுத்துவிட்டது. இதற்கிடையில் பாலச்சந்திர குமார் டிசம்பர் 2024-ல் காலமானார்.
குற்றம் சாட்டப்பட்டவர்கள் கைது செய்யப்பட்ட சிறிது நேரத்திலேயே, தாக்குதலின் வீடியோ காட்சிகளைக் கொண்ட மெமரி கார்டை போலீஸார் கைப்பற்றியிருந்தனர். அதனை காண்பிக்கக் கோரி திலீப் உச்ச நீதிமன்றத்தில் மனு தாக்கல் செய்தார். மெமரி கார்டின் நகலைப் பெற அவருக்கு அனுமதி இல்லை என்றாலும், ஒரு பயனுள்ள வாதத்தை முன் வைக்கும் பொருட்டு, சில எச்சரிக்கைகளுக்கு உட்பட்டு, அதன் உள்ளடக்கங்களை ஆய்வு செய்ய அவருக்கு அனுமதி வழங்கப்பட்டது.
பின்னர் விசாரணை நீதிமன்றத்தின் காவலில் இருந்தபோது மெமரி கார்டு சட்ட விரோதமாக அணுகப்பட்டதாக குற்றச்சாட்டுகள் எழுந்தன.
2024-ம் ஆண்டில், பாதிக்கப்பட்ட நடிகை கேரள உயர் நீதிமன்றத்தில் வழக்கு தொடர்ந்தார். அங்கீகரிக்கப்படாத அணுகல் குறித்து நீதிமன்ற மேற்பார்வையில் மாநில காவல்துறையின் சிறப்பு புலனாய்வுக் குழு (SIT) விசாரணை நடத்த வேண்டும் என்று கோரினார். மேலும், தாக்குதலின் காட்சிகள் கசிந்துள்ளதாகவும் அவர் குற்றம் சாட்டினார்.
உயர் நீதிமன்றம், உண்மை கண்டறியும் விசாரணையை நடத்த அமர்வு நீதிமன்றத்திற்கு உத்தரவிட்டது, மேலும் விசாரணையின்போது பதிவு செய்யப்பட்ட சாட்சி வாக்குமூலங்களின் நகலை பாதிக்கப்பட்ட நடிகை பார்த்துக் கொள்ள அனுமதித்தது.
பின்னர், உண்மை கண்டறியும் விசாரணை “நியாயமான, சுதந்திரமான மற்றும் முழுமையான” முறையில் நடத்தப்படவில்லை என்று குற்றம் சாட்டி பாதிக்கப்பட்டவர் ஒரு விண்ணப்பத்தை தாக்கல் செய்தார். இருப்பினும், உயர் நீதிமன்றம் அதை நிராகரித்தது.
இந்த நடவடிக்கைகளின்போது, நீதிமன்றத்தின் காவலில் இருந்தபோது மெமரி கார்டு 2018 இல் இரண்டு முறை மற்றும் 2021 இல் ஒரு முறை என்று மொத்தம் மூன்று முறை சட்டவிரோதமாக பார்க்கப்பட்டதை மாநில தடயவியல் அறிவியல் ஆய்வகம் கண்டறிந்தது.
சாதனத்தின் நினைவக மதிப்பு மாறிவிட்டதாகவும், மெமரி கார்டில் உள்ள உள்ளடக்கங்கள் மாற்றப்பட்டிருக்கலாம் அல்லது பதிவிறக்கம் செய்யப்பட்டிருக்கலாம் என்றும் அறிக்கைகள் தெரிவித்தன.
நவம்பர் 18-ம் தேதி, இந்த வழக்கின் தீர்ப்பு வரும் டிசம்பர் 8-ம் தேதியன்று அறிவிக்கப்படும் என்று அறிவிக்கப்பட்டது.
டிசம்பர் 8-ம் தேதி காலை 11 மணிக்கு தீர்ப்பு அறிவிக்கப்பட்டது. இதன்படி இந்த வழக்கில் திலீப் மீதான குற்றச்சாட்டுக்களுக்கான ஆதாரங்கள் இல்லாததால் அவர் விடுதலை செய்யப்படுவதாக நீதிபதி அறிவித்தார்.
இந்த வழக்கில் குற்றம் சாட்டப்பட்டோரில் முதல் 6 பேர் மட்டுமே குற்றவாளிகள் என்றும், மற்றவர்கள் விடுதலை செய்யப்படுவதாகவும் நீதிபதி தன் தீர்ப்பில் அறிவித்தார்.
இந்தக் குற்றவாளிகளுக்கான தீர்ப்பு வரும் டிசம்பர் 12-ம் தேதி அறிவிக்கப்படும் என்றும் அறிவித்தார்.
