full screen background image

‘கன்னித் தீவில்’ மக்கள் பிரச்சினைக்காக போராடும் 4 கதாநாயகிகள்

‘கன்னித் தீவில்’ மக்கள் பிரச்சினைக்காக போராடும் 4 கதாநாயகிகள்

திரிஷா நடிப்பில் உருவாகி இருக்கும் ‘கர்ஜனை’ படத்தை இயக்கிய சுந்தர் பாலு இயக்கியுள்ள அடுத்த திரைப்படம் ‘கன்னித் தீவு’.

ந்தப் படத்தில் வரலட்சுமி,  ஐஸ்வர்யா தத்தா, ஆஷ்னா சவேரி, சுபிக்‌ஷா என்று 4 கதாநாயகிகள் நடித்துள்ளனர். இப்படத்தை கிருத்திகா புரொடக்‌ஷன் தயாரித்துள்ளது.

படம் பற்றி இயக்குநர் சுந்தர் பாலு கூறுகையில், “கன்னித் தீவு’ என்ற பெயர் தமிழ் மக்கள் மத்தியில் மிகவும் பிரபலமான பெயர், அதோடு ‘கன்னித் தீவு’ என்றாலே அட்வெஞ்சர் என்பதாலும் இந்தப் பெயரை படத்திற்கு வைத்தோம். மேலும் படத்தில் நான்கு நாயகிகள் இருப்பதால் இந்தப் பெயர் பொருத்தமாக இருக்கும் என்று நினைத்தோம்.

மேலும், இந்தக் ‘கன்னித் தீவு’ என்ற பெயருக்குப் பொருத்தமாக இருக்குமே என்றெண்ணி, படத்தின் கிளைமாக்ஸ் காட்சியை ஒரு தீவில்தான் படமாக்கியுள்ளோம்.

வட சென்னையில் உள்ள ஒரு ஹவுசிங் போர்டு குடியிருப்பில் வசிக்கும் நான்கு பெண்களை மையப்படுத்திய கதை இது.

சின்ன வயதில் இருந்தே தோழிகளான வரலட்சுமி, ஆஷ்னா சவேரி, ஐஸ்வர்யா தத்தா, சுபிக்‌ஷா நான்கு பேரும் சமூக அக்கறையுள்ளவர்கள். உலகத்தை காப்பாற்ற முடியாவிட்டாலும் தங்கள் பகுதியையாவது நன்றாக வைத்திருக்க வேண்டும் என்ற எண்ணம் கொண்டவர்கள்.

அந்தப் பகுதியில் நீண்ட நாளாக இருக்கும் ஒரு பிரச்சினையை தீர்ப்பதற்காக போராட்டத்தில் குதிக்கிறார்கள். அந்தப் பகுதி மக்களின் பேராதரவோடு அந்த போராட்டத்தில் ஈடுபட்டு அதில் பெரிய வெற்றியும் பெறுகிறார்கள்.

அந்த வெற்றியே இந்த நான்கு பேருக்கும் பெரிய பிரச்சினையாக மாறுகிறது. அந்த பிரச்சினை என்ன…? அதில் இந்த நான்கு பேரும் எப்படி போராடி வெற்றி பெற்றார்கள் என்பதை ஆக்சன் த்ரில்லர் திரைக்கதையாக உருவாக்கியுள்ளோம்…” என்றார் இயக்குநர் சுந்தர் பாலு.

ராஜ் பிரதாப் இசையமைக்கும் இப்படத்திற்கு சிட்டிபாபு ஒளிப்பதிவு செய்ய லாரன்ஸ் கிஷோர் படத் தொகுப்பை மேற்கொள்கிறார். அதிரடியான சண்டைக் காட்சிகளை ஸ்டண்ட் சிவா வடிவமைத்துள்ளார்.

தற்போது படத்தின் அனைத்துப் பணிகளும் முடிவடைந்து படம் ரிலீசுக்கு தயாராக உள்ளது. திரையரங்குகள்  திறந்த பின் படத்தை வெளியிட படக் குழுவினர் முடிவு செய்துள்ளனர்.

 
Our Score