தமிழ்ச் சினிமாவில் நேற்றைக்கு வந்த சின்ன ஹீரோக்களுக்குக்கூட ரசிகர் மன்றம் வைத்து அதனையும் ரிஜிஸ்தர் செய்து பக்கவாக நடத்தி வரும்வளையில் தமிழ் ஜனங்களை கடந்த இரண்டு தலைமுறையில் தூங்க வைத்துக் கொண்டிருக்கும் இசைஞானிக்கு ரசிகர் மன்றங்களே துவக்கப்படவே இல்லை என்பது வருத்தமான செய்தி..
இணைய வசதிகள் வந்த பின்புதான் ஆங்காங்கே இருக்கும் இசைஞானியின் ரசிகர்கள் தங்களுக்குள்ளேயே ஒரு குழு அமைத்துக் கொண்டு இசைஞானியின் புகழை பரப்பி வருகிறார்கள். முகநூலில் மட்டும் எண்ணற்ற ரசிகர் மன்ற குழுக்கள் உள்ளன.
வெளியுலகத்தில் பேசப்படும் அளவுக்கு ரசிகர் மன்றம் இல்லாத குறையை இப்போது இசைஞானியின் குடும்பமே நிவர்த்தி செய்திருக்கிறது. இசைஞானியின் மூத்த மகன் இசையமைப்பாளர் கார்த்திக்ராஜாவே இப்போது இசை ஞானியின் ரசிகர் மன்றத்தைத் துவக்குகிறார்.
இதற்கான துவக்க விழா வரும் ஏப்ரல் 5-ம் தேதி மதுரை தமுக்கம் மைதானத்தில் நடைபெறவிருக்கும் இசைஞானி இளையராஜாவின் மாபெரும் இன்னிசை நிகழ்ச்சியின் ஊடே நடைபெறும் என்று அறிவிக்கப்பட்டுள்ளது.
இசைஞானி இளையராஜாவிற்கு உலகம் முழுவதும் ஏராளமான ரசிகர்கள், நலம் விரும்பிகள் இருக்கின்றனர். அவர்கள் அனைவரையும் ஒரு குடையின் கீழ் ஒருங்கிணைக்கும் அமைப்புதான் இந்த ILAYARAJA FANS CLUB.
இளையராஜாவின் அங்கீகாரத்துடன் அவரது புதல்வர் கார்த்திக்ராஜா தலைமையில், தயாரிப்பாளர் பி.வேலுச்சாமி, டைரக்டர் ரத்னகுமார் ஆகியோரை மேனேஜிங் டிரஸ்டிகளாக கொண்டு அரசாங்க அங்கீகாரத்துடன் துவங்கப்படும் அமைப்பு இது.
இந்த அமைப்பு மட்டுமே இசைஞானியின் பெயரில் அதிகாரப்பூர்வமாக செயல்படும் உரிமை கொண்டது. இசைஞானியின் ரசிகர்கள் அவரது இசையால் ஈர்க்கப்பட்டு தங்களுக்கென சில கொள்கைப் பிடிப்புடன் செயல்பட்டு வருகிறார்கள். அவர்களை நல்வழிப்படுத்திய இசைஞானி அவர்களின் ரசிகர்கள் சமூக விழிப்புணர்வு மற்றும் சமூக நற்பணிகள், சமூக முன்னேற்றத்திற்கென ஆக்கப்பூர்வமாக செய்வதென முடிவெடுத்து அதனை இந்த ILAYARAJ FANS CLUB மூலம் செயலாக்க உள்ளனர்.
சாதி, மதம், இனம், அரசியல் போன்ற விசயங்களுக்கு அப்பாற்ப்பட்ட அமைப்பு இது. இதில் ஒரு கோடி பேருக்கு மேல் உறுப்பினராக சேர உள்ளனர். இதற்கான அறிவிப்பை ஏப்ரல் ஐந்தாம் தேதி மதுரை தமுக்கம் மைதானத்தில் அறிவிக்க உள்ளனர். திரைப்படத்துறையில் உள்ள முன்னணி நடிகர், நடிகைகளும் இதில் இணைய உள்ளனர்.
கார்த்திக்ராஜா தலைமையில் “ராஜாவின் சங்கீதா திருநாள்” நிகழ்ச்சி நடைபெறும் அதே ஏப்ரல் ஐந்தாம் தேதி அன்று “இசைஞானி” என்ற வார இதழும் துவங்கப்பட உள்ளது.
ராகதேவனின் புகழ் பரப்ப அவரது வெறி பிடித்த ரசிகர்களுக்கு ஒரு மேடையை இந்த அமைப்பே ஏற்படுத்திக் கொடுப்பது சாலச் சிறந்தது..!
