இந்தப் படத்தைத் தமிழ் எக்ஸாடிக் பிலிம்ஸ் நிறுவனத்தின் சார்பில் தயாரிப்பாளர் சண்முகம் ராமசாமி தயாரித்துள்ளார்.
படத்தில் யூனஸ், எல்வின் ஜூலியட், அகில் பிரபாகரன் , ஷாஜி, ஷீரா, மேகா மாலு, மனோகரன் ஆகியோர் நடித்துள்ளனர். மேலும் வில்லன் வேடத்தில் தயாரிப்பாளர் சண்முகம் ராமசாமி நடித்துள்ளார்.
இசை – கே.ஆர்.ராகுல், ஒளிப்பதிவு – விஷ்ணு கண்ணன், படத் தொகுப்பு – அருண் ராகவ், எழுத்து, இயக்கம் – ராகுல் ஆர்.கிருஷ்ணா.
சஸ்பென்ஸ், திரில்லர் டைப்பில் இந்தப் படம் உருவாகியுள்ளது. நாயகன் ஆதாம் தன் தாயின் உடல் நிலை பாதித்ததால் அவரை மருத்துவமனையில் சேர்க்கிறான். அதேபோல் விபத்தில் சிக்கிய மரியாவும் அதே மருத்துவமனையில் சிகிச்சைக்காக சேர்கிறாள்.
ஒரு கட்டத்தில் இவர்கள் இருவரையும் ஒரு கும்பல் கடத்தி வந்து ரகசிய இடத்தில் அடைக்கின்றனர். கை, கால் கட்டப்பட்டு கிடக்கும் அவர்கள் ஒரு வழியாக அதிலிருந்து மீண்டு அந்த இடத்திலிருந்து தப்பிக்க முயல்கின்றனர்.
ஆனால், இவர்கள் இருவரையும் கடத்தி வந்த கூட்டம் இவர்களை வைத்து ஒரு ரகசிய திட்டத்தைத் தீட்டியிருக்கிறான். அதற்காக இருவரையும் மன ரீதியாக சித்ரவதை செய்கிறான். இருவரையும் ஏன் கடத்தினான், கடத்தல்காரனின் திட்டம்தான் என்ன என்பதுதான் இந்தப் படத்தின் திரைக்கதை.
கதாநாயகனாக ‘ஆதாம்’ வேடத்தில் நடித்திருக்கும் யூனஸ் துடிதுடிப்பான இளைஞராக வருகிறார். சில கோணங்களில் தோற்றத்தில் நடிகர் விஜய்யை நினைவூட்டுகிறார். நடிப்பில் இயக்குநர் சொன்னதைச் செய்துள்ளார். குறை சொல்ல ஒன்றும் இல்லை. கதாநாயகி எவ்லின் ஜூலியட் தப்பிக்கும் காட்சிகளில் நல்ல முக பாவங்களைக் காட்டியுள்ளார். அவரது திரைத் தோற்றம் திருப்தியாக உள்ளது.
தப்பிக்க முயல்வதற்கான க்ளுவை கண்டுபிடிக்க ஹீரோவை நச்சென்று லிப் டூ லிப் கிஸ் கொடுத்து சடனாக கிக் ஏற்றுகிறார் ஜூலியட்.
வில்லனாக நடித்திருக்கும் தயாரிப்பாளர் சண்முகம் ராமசாமி வித்தியாசமான கெட்டப்பில் வந்து குறையில்லாத நடிப்பைக் கொடுத்து வில்லத்தனத்தைக் காட்டியிருக்கிறார். “இவன் அவனில்லை; அவ இவனில்ல” என்ற பாணியில் ஒரு வசனத்தை பொடி வைத்து பேசுகிறார் வில்லன் சண்முகம்.
கே ஆர்.ராகுல் இசையில் படத்தில் மொத்தம் பத்து பாடல்கள் படத்தில் உள்ளது. எல்லாமே சின்னச் சின்னதாக ஓடி மறைகிறது. கிளைமாக்ஸ் முடிந்த பிறகும் திரையில் கடைசியான பாடல் தொடர்கிறது.
ஒளிப்பதிவாளர் விஷ்ணு கண்ணன் அந்தக் குறுகிய அறை கொண்ட செட்டப்பில் பல வித்தியாசமான கோணங்களில் காட்சிகளை சுழன்று படமாக்கியிருக்கிறார்.
‘ஐமா’ என்றால் ‘கடவுள் சக்தி’ என்றும் பொருளாம். திரில்லர் படம் என்ற சமிக்ஞை படத்தின் தொடக்கத்திலேயே தெரிகிறது. பேய் படமாக இருக்குமோ என்று யோசிக்க வைத்து மெல்ல, மெல்ல சைன்ஸ் பிக்ஷனாக மாறுகிறது.
நாயகன் – நாயகி பாத்திரங்களின் மூலம் தற்கொலை செய்து கொள்ள முடிவெடுப்பவர்கள். தங்கள் உயிருக்கு ஆபத்து வரும்போது அதிலிருந்து தப்பித்து உயிர் வாழவே எண்ணுகிறார்கள் என்ற உளவியல் உண்மையைக் காட்டியுள்ளார்கள். அவர்களின் உயிர் தப்பித்தல் முயற்சிகளை அணு, அணுவாக ரசிக்கும் வில்லனின் குரூர குணமும் காட்டப்பட்டுள்ளது.
யாருமே இல்லாத இடம்போல் சஸ்பென்சாக காட்சிகள் நகரும்போது, திடீரென்று வில்லன் என்ட்ரி, அடியாட்கள் என்ட்ரி எல்லாம் அந்த சஸ்பென்சை நீர்த்துப் போகச் செய்கிறது.
இயக்குநர் ராகுல் ஆர்.கிருஷ்ணா ஹாலிவுட் சைன்ஸ் பிக்ஷன் பாணியில் கதையை சொல்ல முயன்றிருக்கிறார். காட்சிகளில் இன்னும்கூட விறுவிறுப்பு சேர்த்திருக்கலாம்.
ஐமா – சர்வைவல் சஸ்பென்ஸ்.
RATING : 2.5 / 5
