எஸ்.டி.ஆர். என்னும் சிலம்பரசன் என்னும் நடிகர் சிம்பு சமீப காலமாக தன்னுடைய சிந்தனையிலும் செயலிலும் அபரிதமான மாற்றங்களை மேற்கொண்டு வருகிறார்.
ஆன்மீக ஈடுபாடு தன்னுடைய மாற்றங்களுக்கு பெரிதும் உதவும் என்பதில் தீவிரமாக நம்புகிறார். அதில் அதிமுக்கியமானதாக அவர் செய்திருப்பது, தான் இதுவரையில் பயன்படுத்தி வந்த அடையாளமான ‘யங் சூப்பர் ஸ்டார்’ என்னும் பட்டத்தை துறப்பதுதான்.
இது குறித்து இன்று அவர் வெளியிட்டுள்ள அறிக்கை இது :
“என்னுடைய திரை வாழ்வில் நான் முக்கியமான கட்டத்தை எட்டி உள்ளேன். தேவையற்ற சுமைகளை என் வாழ்வில் இருந்து அகற்ற முடிவு செய்து உள்ளேன். என்னுடைய இமேஜ், அது என்னுடைய ரசிகர்கள் இடையே ஏற்படுத்தும் விளைவுகள் ஆகியவற்றை முக்கியமென உணர்ந்து வருகிறேன்.
சமுதாயத்தின் மீது அக்கறை கொண்டவன் என்ற முறையில் ‘முக்கியத்துவம் இல்லாத பட்டங்கள்’ வளரும் கலைஞனுக்கு அவசியமற்றது என கருத ஆரம்பித்து இருக்கிறேன்.
திரையில் என் மீது அன்பு கொண்டவர்களையும் தாண்டி, எல்லோருடைய அன்பையும் மரியாதையையும் பெற வேண்டும் என்ற எண்ணம் எனக்குள் மேலோங்கி வருகிறது. பட்டம் துறப்பது என்ற என்னுடைய இந்த முடிவு அதற்கான முதல் வழியாகும்.
என்னுடன் என்றென்றும் இருக்கும், இருக்க போகும் என் இனிய ரசிகர்கள் இந்த முடிவை ஏற்று ஒத்துழைப்பார்கள் என நம்புகிறேன்…” என்று தனது அறிக்கையில் கூறியுள்ளார் நடிகர் சிம்பு.
