full screen background image

“என்னை திசை திருப்பிய ஒரு முன்னாள் உதவி இயக்குநர்..” – நடிகர் அசோக் செல்வனின் பேட்டி

“என்னை திசை திருப்பிய ஒரு முன்னாள் உதவி இயக்குநர்..” – நடிகர் அசோக் செல்வனின் பேட்டி

தமிழ் திரையுலகில் குறுகிய காலத்தில் தனக்கென ஒரு இடம் பிடித்த சில கதாநாயகர்களில்   அசோக் செல்வன் ஒருவர்.  தனது மெல்லிய புன்னகையால் காதல் நாயகனாக பல ரசிகர்களை தன் பக்கம் இழுப்பவர். இப்போது முழு நீள கமர்ஷியல் பொழுதுபோக்கு திரைப்படமாய் உருவாகியுள்ள ‘சவாலே சமாளி’ படத்தின் வெளியீட்டை எதிர்நோக்கியிருக்கிறார்.

‘கழுகு’ புகழ் சத்யசிவா இயக்கத்தில் தான் நடித்திருக்கும் ‘சவாலே சமாளி’ படம் பற்றி பேசினார் நடிகர் அசோக் செல்வன்.                    

“ஒரு படத்திற்கு கதையே பிரதானம் என்று திண்ணமாய் நம்புபவன் நான்.  நான் இதுவரை ஏற்று நடித்து இருந்த பாத்திரங்களும், நான் நடித்த படங்களும் சீரியஸ் டைப்தான்.  ஒரு கமர்ஷியல் படத்தில் என்னால் ஈடு செய்ய முடியுமா என்று சந்தேகம் என்னுள் எப்பவும் இருக்கும். அதே நேரத்தில்தான் ‘கழுகு’ இயக்குனர் சத்யா சிவாவையும், தயாரிப்பாளர் அருண் பாண்டியனையும் சந்திக்க நேர்ந்தது.

அருண் பாண்டியன் சார் தயாரிக்க, சத்யசிவா இயக்க உருவாகும் ‘சவாலே சமாளி’ படத்தின் கதையை என்னிடம் நடிக்க சொல்லிக் கேட்டனர். கதை எனக்கு பிடித்து இருந்தாலும் முழுக்க முழுக்க மசாலா கலந்த கமர்ஷியல்  படம் எனக்கு பொருந்துமா என்ற சந்தேகம் எழுந்தது. அப்போதுதான்  இந்தப் படத்தை ஏற்றுக் கொண்டு நடிக்க தூண்டுதலாய் ஒரு சம்பவம் நடந்தது’ எனக் கூறி அதை விவரிக்க தொடங்கினார்.

 எனது நெருங்கிய  உறவினரின்  திருமண விழாவுக்குச் செல்ல நேர்ந்தது. அங்கு எனக்கு உணவு பரிமாறிய ஒருவர் என்னை அடையாளம் கண்டு என் படங்களை பற்றி  விமரிசித்து பேச ஆரம்பித்தார். பேச்சுவாக்கில் கமல் சாரின் ராஜ பார்வை, சகலகலாவல்லவன் படங்களை சுட்டி காட்டி ஒரு நடிகர் என்றால் அவரைப் போலவே அனைத்துவிதமான கதையம்சமுடைய படங்களையும் செய்ய வேண்டும்.  அதுதான் ஒரு முழுமையான நடிகனுக்கு அழகு’ என்றார்.

 ‘உங்க படங்கள் எல்லாம் நல்லாத்தான் இருக்கு. ஒரு தரப்பு ரசிகர்களுக்கு மட்டும் படம் பண்ணினா எப்படி? முழு நீள காமெடி படம் ஒண்ணுல ஜாலியா நடிங்க பாஸு” எனக் கூறினார். எனக்கும் அவர் சொன்னது சரி என்று பட்டது.

அவர் யார் என்று விசாரித்த போதுதான் தெரிந்தது அவர் ஒரு முன்னாள் உதவி இயக்குநர் என்பதும் இயக்குநராக  வாய்ப்பு தேடி கிடைக்காமல் கேட்டரிங் தொழிலை மேற்கொண்டவர் என்பதும்.

சரியான நேரத்தில் சரியான வார்த்தைகள் என்றே எனக்கு அதுபட்டது.  இந்த வார்த்தைகள் கொடுத்து உந்துதலும்  தைரியமும், தயாரிப்பாளர் அருண்பாண்டியன் சார் மற்றும் இயக்குனர் சத்யசிவா மீது இருந்த நம்பிக்கையும் என்னை இப்படத்தில் நடிக்க ஒப்புக் கொள்ள வைத்தது. 

‘சவாலே சமாளி’ படம் ஒரு கலைஞனாக எனக்கு புதிய பரிணாமத்தை அளிப்பதோடு பல்வேறு வயதினரையும் என்னை ரசிக்க வைக்கும் என நம்புகிறேன்..” என்று உறுதியுடன் சொல்கிறார் அசோக் செல்வன். 

Our Score