full screen background image

ஆஸ்கார் நாயகன் ஏ.ஆர்.ரஹ்மானின்  ‘ஒன் ஹார்ட்’ திரைப்படம்

ஆஸ்கார் நாயகன் ஏ.ஆர்.ரஹ்மானின்  ‘ஒன் ஹார்ட்’ திரைப்படம்

இந்தத் தலைமுறையின் ஒப்பற்ற இசை மேதை ஏ.ஆர்.ரஹ்மான். தமிழைத் தவிர வேறு மொழிகளை பேசும் இந்த உலகில் உள்ள அனைவர்களுக்கும் தமிழிசையின் இனிய சாற்றினையும், இந்திய இசையின் இனிமையையும் ஒரே சேர அளித்து தனித்துவமான அடையாளத்துடன் வலம் வருபவர்.

ஆஸ்கார் விருதை இந்திய திரையிசை அமைப்பாளர்களாலும் பெற முடியும் என்பதை தன்னுடைய திறமையால் நிரூபித்தவர். இவரின் சிந்தனையில் உருவான படம்தான் ‘ஒன் ஹார்ட்.’

தமிழ் சினிமா ரசிகர்கள் என்றைக்கும் புதுமையை ஆராதித்து கொண்டாடுபவர்கள். அவர்களுக்கு ‘கான்சர்ட் ஜேனர்’ என்ற புதுவகையான சினிமாவை ‘ஒன் ஹார்ட்’படத்தின் மூலமாக அறிமுகப்படுத்துகிறார் ஏ.ஆர்.ரஹ்மான். 

‘கான்சர்ட் ஜேனர்’ என்றால், ஒரு இசைக் கலைஞர் தன்னுடைய இசைக் குழுவுடன் இணைந்து ஒரு இசை நிகழ்ச்சியை எவ்விதம் வெற்றிகரமாக மேடையேற்றுகிறார் என்பதை விவரிக்கும் படம்தான் ‘கான்சர்ட் ஃபிலிம்’. 

ஹாலிவுட்டில் இதற்கு முன் ஏராளமான இசைக் கலைஞர்களின் தனிப்பட்ட நிகழ்ச்சியை முன் வைத்து இது போன்ற படங்கள் வெளியாகியிருக்கின்றன. இருப்பினும் மைக்கேல் ஜாக்சன் இறப்பதற்கு முன் அவரை வைத்து உருவாக்கப்பட்ட திஸ் இஸ் இட் (This is it) என்ற ‘கான்சர்ட் திரைப்படம்’ பெரும் வரவேற்பை பெற்றது.

இதை முன் மாதிரியாக கொண்டு இந்தியாவிலும் இது போன்ற முன்னணி இசைக் கலைஞராக புகழ்பெற்று திகழும் ஏ.ஆர்.ரஹ்மானை முன்னிறுத்தி உருவான கான்சர்ட் ஃபிலிம்தான் ‘ஒன் ஹார்ட்’.

a.r.rahman 

இந்தப் படத்தை ஏ.ஆர்.ரஹ்மானின் ‘ப்ரொபஷனல் பயோகிராபி’ என்றும் சொல்லலாம். இந்தப் படம் ரசிகர்களுக்கு அவரைப் பற்றிய புரிதலை புதிய கோணத்தில் அளிக்கும் என்று உறுதியாக சொல்லலாம்.

ஏ.ஆர்.ரஹ்மான், அமெரிக்காவில் மேற்கொண்ட இசைப் பயணம் மிகப் பெரிய வெற்றியைப் பெற்றது. இந்த இசைப் பயணத்தின்போது பதினாறு இசை நிகழ்ச்சிகள் நடைபெற்றது. இந்த பதினாறு இசை நிகழ்ச்சிகளையும் தொகுத்து ஒரே படமாக உருவாக்கியதின் முதல் முயற்சிதான் இந்த ‘ஒன் ஹார்ட்’ திரைப்படம்.

ஏ.ஆர்.ரஹ்மானும் அவருடைய இசைக் குழுவினரும்தான் இதன் நாயகர்கள் மற்றும் நடிகர்கள். இதில் அவருடன் பாடகர்கள் ஹரிசரண், ஜொனிதா காந்தி உள்ளிட்ட ஏராளமானவர்கள் பங்கு பெற்றிருக்கிறார்கள். அவருடைய குழுவில் இடம் பெற்றிருக்கும் அனைத்து கலைஞர்களும் முப்பது வயதிற்குட்பட்ட இளைய தலைமுறையினர்தான் என்பது குறிப்பிடத்தக்கது.

இந்தப் படத்தில் ‘இண்டிமேட்’ என்ற ஒரு புது விசயத்தை அறிமுகப்படுத்தியிருக்கிறார். அதாவது மக்களில் ஒருவனாக தன்னை வைத்துக் கொண்டு, அவர்களுக்காக சிந்திப்பது. அதேபோல் இவருடைய இசை நிகழ்ச்சியை ரசிக்கும் ரசிகர்களின் பரவச உணர்ச்சியும் இதில் இடம் பிடித்திருக்கிறது.

இதுவரை நீங்கள் ஏ.ஆர்.ரஹ்மான், மேடையில் பாடியிருப்பதை கண்டு ரசித்திருப்பீர்கள். அவர் நிகழ்ச்சியை ஒருங்கிணைத்து நடத்துவதைப் பார்த்து ரசித்திருப்பீர்கள். ஆஸ்கார் விருது வாங்கியதைப் பார்த்திருப்பீர்கள். ஆனால் ஒரு இசை நிகழ்ச்சிக்கான முன் தயாரிப்பு குறித்தோ, அதற்கான பணிகளில் எப்படி தன்னுடைய குழுவினருடன் ஈடுபடுகிறார் என்பது குறித்தோ, மேடைகளில் பாட வேண்டிய மற்றும் இடம் பெற வேண்டிய நிகழ்வுகளின் வரிசை பட்டியல் குறித்தோ அதற்கான பின்னணி குறித்தோ அறிந்திருக்கமாட்டீர்கள். அதனை சுவைப்பட சொல்வதுதான் இந்தப் படம்.

இதில் ஒவ்வொரு கலைஞரையும் அவர் ஏன் தேர்வு செய்தார்..? அதன் பின்னணி என்ன..? அவர்கள் மேடை நிகழ்ச்சியில் பங்குபெறும்போது அவர்களிடமிருந்து வெளிப்படும் திறமை என்ன என்று பலவற்றையும் ஏ.ஆர்.ரஹ்மான் விவரிக்கும்போது சுவராஸ்யமாக இருக்கும்.

அவர் ஒரு இசைக் குறிப்பை எப்படி உருவாக்குகிறார்..? அதனை ஏனைய இசைக் கலைஞர்களுடன் இணைந்து எப்படி மேம்படுத்துகிறார்…? அவர் தன்னுடன் பணியாற்றும் இசைக் கலைஞர்களை, அவர்களின் திறமையைக் கடந்து, எந்தவொரு தனித்துவமான பண்பின் அடிப்படையில் அல்லது எமோஷனல் அடிப்படையில் தேர்ந்தெடுக்கிறார் என்பதையும் அவர் விளக்கி கூறும் போது புது அனுபவமாக இருக்கும்.

இந்த படத்திற்குள் ஒரு கதைக்கான அனைத்து விசயங்களும் உள்ளன. நீங்கள் திரையரங்கத்திற்கு வந்து பாடல்களை மட்டும் கேட்கப் போவதில்லை. இது முற்றிலும் மாறுபட்ட அனுபவமாக இருக்கும்.

இந்த ‘ஒன் ஹார்ட்’ படத்தில் பதினாறு பாடல்கள் இடம் பெற்றுள்ளன. இதில் மெலோடியான பாடல்களும் உண்டு. ராப் பாடல்களும் உண்டு. ஃபோக் பாடல்களும் உண்டு. தமிழ்ப் பாடல்களும் உண்டு. ஒவ்வொரு பாடலின் பின்னணியில் அது உருவான கதையின் சுவராசியமும் உண்டு. இது ரசிகர்களை கவரும் வகையில் அமைந்திருக்கிறது.

ஏ.ஆர்.ரஹ்மானின் லைவ் கான்சர்ட் நிகழ்ச்சியை நேரில் பார்ப்பது போன்ற உணர்வை துல்லியமான ஒலிக் குறிப்புடன் கேட்டு ரசிக்கலாம். இந்தப் படத்திற்கான ஒலிக் கலவை முழுவதையும் டால்பி அட்மாசில் செதுக்கியிருக்கிறார்கள். இதைக் கேள்விப்பட்ட டால்பி நிறுவனம், தாமே முன்வந்து இப்படத்திற்கு விளம்பரதாரராகியிருக்கிறது. அத்துடன் இப்படத்தின் பயன்படுத்தப்பட்டிருக்கும் ஒலியின் தரத்தையும் உலகளாவிய அளவில் பாராட்டி அங்கீகரித்திருக்கிறது. 

இந்தப் படத்தை திரையரங்கத்தில் காணும்போது உங்களுக்கு சிரிக்கத் தோன்றும். அழத் தோன்றும். உணர்ச்சி மேலீடும். கோபம் வரும். பலவித உணர்வுகளின் கலவையாக இப்படம் இருக்கும். 

இந்தப் படத்தை கனடாவில் ப்ரீமியர் ஷோவாக திரையிடப்பட்டபோது ஏராளமான வரவேற்பும், பாராட்டும் கிடைத்திருக்கிறது.  

இத்தகைய சிறப்பைப் பெற்ற ‘ஒன் ஹார்ட்’ படம் உலகம் முழுவதும் விரைவில் தமிழ், ஆங்கிலம், ஹிந்தி ஆகிய மூன்று மொழிகளில் ஒரே சமயத்தில் வெளியாகும் என்று எதிர்பார்க்கப்படுகிறது. வரும் ஆகஸ்ட்  25-ம் தேதி இந்தப் படம் வெளியாகலாம் என்று தெரிகிறது. 

பாமரன் முதல் படித்த மக்கள்வரை அனைவரும் கொண்டாடும் வகையில் இந்தப் படம் இருக்கும் என்பது மட்டும் உறுதி.

 

Our Score