தமிழ்த் திரைப்பட தயாரிப்பாளர் சங்கத்தின் தேர்தல் தேதி அறிவிக்கப்பட்டுள்ளது.
தமிழ்த் திரைப்பட தயாரிப்பாளர் சங்கத்திற்கு 2 வருடங்களுக்கு ஒரு முறை தேர்தல் நடத்தப்படும். கடந்த தேர்தல் 2015-ம் ஆண்டு ஜனவரி மாதம் நடைபெற்றது. அந்தத் தேர்தலில் தலைவராக தாணு, செயலாளர்களாக டி.சிவா, ராதாகிருஷ்ணன், துணைத் தலைவர்களாக கதிரேசன், தேனப்பன், பொருளாளராக டி.ஜி.தியாகராஜன் ஆகியோர் தேர்ந்தெடுக்கப்பட்டனர்.
இவர்களது பதவிக் காலம் அடுத்த மாதத்தோடு முடிவடைவதால் புதிய தேர்தல் நடத்த தயாரிப்பாளர் சங்கத்தில் முடிவெடுக்கப்பட்டது. நேற்று இரவு சங்க அலுவலகத்தில் நடைபெற்ற அவசர செயற்குழு கூட்டத்தில் தயாரிப்பாளர் சங்கத்திற்கான தேர்தலை வரும் பிப்ரவரி மாதம் 5-ம் தேதி நடத்த முடிவு செய்யப்பட்டுள்ளது.
இந்தச் சங்கத்தில் இப்போது 1201 உறுப்பினர்கள் உள்ளனர். இவர்கள் ஓட்டளித்து 1 தலைவர், 2 செயலாளர்கள், 2 துணைத் தலைவர்கள், 1 பொருளாளர், மற்றும் 21 செயற்குழு உறுப்பினர்களை தேர்வு செய்வார்கள்.
