Sri Siddeshwara Enterprises – MTB Nagaraj Presents ஆகிய நிறுவனங்கள் இணைந்து மிகப் பிரம்மாண்ட பொருட்செலவில் தயாரிக்கும் திரைப்படம் ‘கப்ஜா’.
ஒரு வெற்றிகரமான கதை இருந்தால் அது மொழிகளைக் கடந்து வரவேற்பு பெறும்; அது வெளியாகும் பல மொழிகளிலும் வெற்றி பெறும். பல மொழி நட்சத்திரங்கள் பங்கேற்றுப் பட வெளியீட்டுக்குப் பின் இந்திய அளவில் பேசப்பட்டு அது ஒரு பேன் இந்தியா மூவியாக மாறும். அப்படி ஒரு பேன் இந்தியா மூவியாக உருவாகி வரும் படம்தான் இந்த ‘கப்ஜா’.
இந்தப் படத்தில் கன்னடத் திரையுலக சூப்பர் ஸ்டார் யதார்த்த நாயகன் உபேந்திரா நாயகனாக நடிக்கிறார். மற்றொரு நட்சத்திரமான சுதீப்பும் இதே படத்தில் இன்னொரு நாயகனாக நடிக்கிறார். இருவேறு நிலையில் எதிர்பார்ப்புள்ள கதாநாயகர்கள் இருவரும் இதில் இணைந்து நடிக்கிறார்கள். ஒரு நாயகியாக ஸ்ரேயா ஷரண் நடிக்கிறார்.
நிழலுலக அரசனாக உபேந்திரா நடிக்க ராணியாக ஸ்ரேயா நடிக்கிறார். ஏற்கெனவே இவர் கன்னடத்தில் புனித் ராஜ்குமாருடன் நடித்த படம் பெரிய திருப்பு முனையாக இருந்தது. சற்று இடைவெளிக்குப் பின் உபேந்திராவுக்கு ஜோடியாக இந்த ‘கப்ஜா‘வில் நடிப்பது கன்னடத்தில் ஷ்ரேயாவுக்கு மீண்டும் ஒரு மறுபிரவேசமாக அமையும் என்கிறார்கள். இன்னொரு நாயகி பற்றிய அறிவிப்பு விரைவில் வெளிவரும்.
இந்தப் படத்தை இயக்குநர் ஆர். சந்துரு இயக்குகிறார். இவர் ஏற்கெனவே பல்வேறு முன்னணி நட்சத்திரங்களை வைத்து இயக்கிய பதினொரு படங்களில் பெரும்பாலானவை வெற்றிப் படங்கள் அல்லது பேசப்பட்டவை. ‘கப்ஜா’ இவருக்கு 12-வது படம்.
இயக்குநர் சந்துரு இதுவரையிலும் இரண்டு மாநில விருதுகள், இரண்டு பிலிம்ஃபேர் விருதுகள் உள்ளிட்ட பல விருதுகளைப் பெற்றவர்.
பெரிதும் பேசப்பட்ட ‘கே.ஜி.எஃப்.’ படத்தில் பணியாற்றிய பலரும் இதிலும் பங்கேற்றுள்ளனர். ‘கே.ஜி.எஃப்.’ படத்தை போல் இரு மடங்கு பட்ஜெட்டில் பெரிதாக இப்படம் உருவாக உள்ளது.
‘கே.ஜி.எஃப்.’ படத்திற்கு இசை அமைத்த ரவி பஸ்ரூர்தான் இந்த ‘கப்ஜா’ படத்துக்கும் இசையமைக்கிறார். இப்படத்திற்கு ஒளிப்பதிவு ஏ.ஜே.ஷெட்டி, கலை இயக்கம் சிவக்குமார்.
தமிழ், தெலுங்கு, மலையாளம், கன்னடம், ஒரியா, மராத்தி, இந்தி என 7 மொழிகளில் இப்படம் உருவாகிறது.
கலைக்கு மொழி அடையாளம் இல்லை என்பதை நிரூபிக்கும்வகையில் அனைத்து மொழிகளுக்குமான பொதுத் தன்மையோடு இந்தப் படம் உருவாகிறது.
இந்தப் படத்தின் பூஜை மற்றும் தொடக்க விழா பெங்களூரில் மோகன் பிகரே ஸ்டுடியோவில் இன்று நடைபெற்றது.
