full screen background image

செஞ்சி – சினிமா விமர்சனம்

செஞ்சி – சினிமா விமர்சனம்

ஏலியன் பிக்சர்ஸ் நிறுவனத்தின் சார்பில் தயாரிப்பாளர் கணேஷ் சந்திரசேகர் இந்தப் படத்தைத் தயாரித்துள்ளார்.

இந்தப் படத்தில் கணேஷ் சந்திரசேகர், க்ஷேன்யா பான்பெரோவா, யோகிராம், ஸ்ரீரம்யா, சுஹைஜு கள்ளரா, Dr. சுஜாதா டொரைமணிக்கம், மாஸ்டர். சாய் ஸ்ரீனிவாசன், மாஸ்டர் தர்சன் குமார், மாஸ்டர் விதேஷ் ஆனந்த், மாஸ்டர் சஞ்சய், பேபி தீக்ஷன்யா மற்றும் பலர் நடித்துள்ளனர்.

தயாரிப்பு – க.சந்திரசேகரன், ஒளிப்பதிவு – ஹரிஷ் ஜிண்டே, இசை – எல்.வீ.முத்து கணேஷ், படத் தொகுப்பு – ஆனந்த் ஜெரால்டு, கிருஷ்ணன் உன்னி, நடனப் பயிற்சி இயக்கம் – திருபுவன் பெங்களூரு, சண்டை இயக்கம் – மாஸ் வெற்றி, கலை இயக்கம் – நட்ராஜ், பத்திரிகை தொடர்பு – சக்தி சரவணன். இந்தப் படத்திற்கு கதை எழுதி, இயக்கி, தயாரித்து முதன்மைக் கதாபாத்திரத்திலும் நடித்துள்ளார் கணேஷ் சந்திரசேகர்.

ஒரு புதையல் வேட்டை சார்ந்த கதையாக உருவாகியுள்ளது இந்த ‘செஞ்சி’ படம்.

பிரான்சிலிருந்து பாண்டிச்சேரிக்கு வரும் சோபியா தனது மூதாதையர் வீட்டை அடைகிறாள். வீட்டில் நுழையும்போதே ஒரு கெட்ட சகுனம் வருகிறது. ஆனால் அவள் அதைப் பற்றி கவலைப்படாமல் உள்ளே நுழைகிறாள்.

அங்கே பழைய புராதன கலைப் பொருட்கள் ஏராளமாக இருக்கின்றன. அவற்றை ரசித்து, ரசித்துப் பார்க்கிறாள் .ஆனால் அங்கே ஏதோ ஒரு அமானுஷ்யம் இருப்பதாக அவளுக்குத் தட்டுப்படுகிறது. எவ்வளவு தைரியமாக இருந்தாலும் மனதிற்குள் ஒரு பயம் வருகிறது.

அங்கே ஒரு ஓலைச்சுவடியைக் கண்டெடுக்கிறாள். அதில் ஏதோ ரகசியம் இருப்பதாகப் படவே தொல்பொருள் ஆராய்ச்சி செய்யும் ஜாக் ஆண்டர்சனை நாடுகிறாள். அவர் வந்து அதை உற்று நோக்கிய போது அதற்குள் ஏதோ ஒரு ரகசியம் புதைந்திருப்பதாகத் தோன்றுகிறது. அது பற்றி மேலும் அறிய விரும்பும்போது அதில் ஒரு புதையலுக்கான ரகசிய குறியீடுகள் உள்ளதாக அவருக்குத் தெரிகிறது. சோபியாவுடன் இணைந்து தேட ஆரம்பிக்கிறார்.

ரகசிய குறிப்புகளை வைத்துக்கொண்டு கிடைத்த குறியீடுகளின்படி தேட ஆரம்பிக்கிறார்கள். புதையல் வேட்டைக்கான பாதையில் ஐந்து தடயங்கள் உள்ளதாகக் குறிப்புகள் கூறுகின்றன. ஒவ்வொரு இடங்களுக்கும் சென்று இறுதியில் அந்தப் புதையலை கண்டு பிடித்தார்களா.. இல்லையா.. என்பதுதான் இந்த செஞ்சி படத்தின் கதை.

ஒரு புதையல் வேட்டை போல் இந்தக் கதை தொடங்குகிறது. படம் ஆரம்பித்த பத்து நிமிடத்திற்குள் ஒரு பரபரப்பு நம்மைத் தொற்றிக் கொள்கிறது. ஏதோ ஒரு ரகசியம், மனித அறிவுக்குக் கட்டுப்படாத ஒன்று இருப்பதாக நம்மை அழைத்துச் செல்கிறது.

புதையல் தேடுவதற்கான படிநிலைகளில் ஒரே நட்சத்திரத்தில் அதுவும் கேட்டை நட்சத்திரத்தில் பிறந்த ஐந்து பேர்தான் அந்தப் புதையலை எடுப்பதற்குத் தகுதியானவர்கள் என்று ஒரு நிபந்தனை வருகிறது.

அளவில்லாமல் சுட்டித்தனம் செய்யும் அந்தச் சிறுவர்கள், பெற்றோர்களால் தண்டிக்கப்படவே வீட்டை விட்டு வெளியேறுகிறார்கள். அவர்கள் காடு மேடு எனச் செல்லும் பாதையில் புதையல் இருக்கும் இடத்தை அடைகிறார்கள். அவர்களுக்கும் கதைக்கும் என்ன சம்பந்தம் என்று இரண்டாவது பாதியில் புதிரை அவிழ்க்கிறார் இயக்குநர்.

இந்தப் படத்தில் ஒரு தொல்பொருள் ஆராய்ச்சியாளராக இயக்குநர் கணேஷ் சந்திரசேகர் நடித்துள்ளார். வசன உச்சரிப்பில் அவர் இன்னமும் தேறி வர வேண்டும். ஒரே நேரத்தில் ஆங்கிலத்திலும், தமிழிலும் வசனம் வருவதைத் தவிர்த்திருக்கலாம்.

வெளிநாட்டிலிருந்து வரும் ஆங்கிலேயப் பெண்மணியாக ரஷ்ய நடிகை கெசன்யா நடித்துள்ளார். இயக்குநரைவிட அந்த நடிகை  மிகச் சிறப்பாக நடித்து உள்ளார். தோற்றத்திலும் உடல் மொழியிலும், வசன உச்சரிப்பிலும் அனுபவம் தெரிகிறது. படத்தில் சுட்டித்தனம் செய்யும் அந்த ஐந்து சிறுவர்களும் மாஸ்டர். சாய் ஸ்ரீனிவாசன், மாஸ்டர் தர்சன் குமார், மாஸ்டர் விதேஷ் ஆனந்த், மாஸ்டர் சஞ்சய், பேபி தீக்ஷன்யா மனதில் பதிகிறார்கள்.

படத்தில் மூன்று பாடல்கள் தேடல் தேடு’ என்ற பாடல் படத்தின் ஆரம்பத்தில் டைட்டில் வரும் போது ஒலிக்கிறது. ‘வேண்டும்’ என்ற பாடல் பிறகு வருகிறது. தங்கப் புதையலைக் கண்டுபிடித்த பிறகு பாடும் ‘இது தங்கம்’ என்கிற பாடல் சிறுவர்களைக் கவரும். பாடல் காட்சிகளின் இசையைவிட பின்னணி இசையில் இசையமைப்பாளர் எல். வி. முத்து கணேஷ் பளிச்சிடுகிறார்.

படத்தில் நடித்துள்ள நடிகர்களைவிடவும் படத்துக்குப் பெரிதாகப் பலமாக அமைந்துள்ளது படத்தில் வரும் லோகேஷன்கள்தான். காட்சிகள் செஞ்சி தொடங்கி பல்வேறு நிலப்பகுதிகளிலும் படமாகி உள்ளது. பெரும்பாலும் கல்லார் காட்டுப் பகுதியில்தான் படமாகி உள்ளது. கதைப்படி செஞ்சி, மதுரை, ராஜபாளையம், தென்காசி, கல்லார் என்று நிகழ்விடங்கள் வருகின்றன.

அந்தக் காற்று செதுக்கிய சிற்பங்களாக இருக்கும் அந்தப் பாறைகள் நடுவே சென்று சந்து பொந்து இடுக்கு வழியில் எல்லாம் புகுந்து புறப்பட்டு உள்ளது கேமரா. ஒளிப்பதிவாளர் ஹரிஸ் ஜிண்டேவுக்குப் பாராட்டு கூறலாம். நம் தென்னிந்தியப் பகுதியில் இதுவரை கேமரா நுழையாத பல இடங்களில் நுழைந்து படப்பிடிப்பு நடத்தியிருக்கிறார்கள்.

சிறுவர்கள் அடிக்கும் லூட்டிகள் சம்பந்தப்பட்ட நீளமான காட்சிகளுக்கு சற்றுக் கத்திரி போட்டிருக்கலாம். அதே சமயம் தீவிரவாதிகள் சம்பந்தப்பட்ட காட்சிகளிலும் முதிர்ச்சி தெரியவில்லை. மேலும் சில காட்சிகளை  நேர்த்தியாக்கி இருந்தால், படம் மேலும் மேம்பட்டிருக்கும்.

நமது பழங்கால வரலாற்று உணர்வை வரவழைக்கும் முயற்சியாக உருவாக்கியவிதத்தில் இந்த செஞ்சி’ படம் வெற்றி பெற்றுள்ளது. குறைகளை எல்லாம் புறந்தள்ளிவிட்டு அந்த நிலக் காட்சிகளுக்காகவே படத்தை ரசிக்கலாம்.

மொத்தத்தில் இந்த ‘செஞ்சி’ படம் ஒரு வரலாற்று உணர்வை நினைவூட்டும் படம் என்று உறுதியாகக் கூறலாம்.

RATING : 1.5 / 5

Our Score