தமிழ், தெலுங்கு, மலையாளம், கன்னடம் மற்றும் ஹிந்தி திரையுலகில் தான் நடித்துள்ள படங்களால் நன்கு அறியப்பட்டவர் நடிகை நிரோஷா ராதா.
1988-ல் மணிரத்னம் இயக்கத்தில் வெளியான ‘அக்னி நட்சத்திரம்’ படத்தில் நடிகையாக அறிமுகமான நிரோஷா ராதா, அதன் பிறகு பல வெற்றிப் படங்களிலும் விமர்சன ரீதியாக பாராட்டு பெற்ற படங்களிலும் நடித்தார்.
தமிழ், தெலுங்கு, கன்னடம், மலையாளம் மற்றும் இந்தி ஆகிய மொழிகளில் கிட்டத்தட்ட 100 படங்களுக்கும் மேல் நடித்துள்ளார் நிரோஷா ராதா. 1988 முதல் 1995-ம் ஆண்டுவரையிலும் முன்னணி நடிகையாக வலம் வந்தார்.
நடிகை நிரோஷா ராதா பாக்ஸ் என்டர்டெய்ன்மென்ட் என்ற நிறுவனத்தை பல ஆண்டுகளாக நடத்தி வருகிறார்.
இந்த பாக்ஸ் என்டர்டெய்ன்மென்ட் நிறுவனம் புதிய, தனித்துவமான படைப்புகளுக்கு முக்கியத்துவம் கொடுத்து திரைப்படம் மற்றும் சின்னத்திரை தொடர்களை தயாரிக்கும் ஒரு நிறுவனம் ஆகும். இன்னும் பல சிறந்த கம்பெனிகளுடன் இணைந்து நல்ல பல தயாரிப்புகளை இந்த நிறுவனம் உருவாக்கியுள்ளது.
ஸ்ரீலங்காவிலுள்ள ‘ஸ்வர்ண வாஹிணி’ தொலைக்காட்சிக்காக 4 மெகா தொடர்களை நிரோஷா ராதா தானே தயாரித்தும் இயக்கியும் உள்ளார். அவரே தயாரித்து நாயகியாகவும் நடித்த ‘ஷக்கலக்க பேபி’ தொடர் இலங்கை மக்களிடையே மிகப் பெரிய வரவேற்பை பெற்றதுடன் அவர் நடித்த கதாபாத்திரத்தின் பெயராலேயே ரசிகர்கள் மத்தியிலும் அழைக்கப்பட்டார். மேலும் தமிழில் பல முன்னணி சேனல்களில் ‘உயிரே’, ‘ஆனந்தி’ போன்ற தொடர்களை தயாரித்து நடித்தும் உள்ளார்.
நிரோஷா ராதா விளையாட்டு போட்டிகளில் ஆர்வம் கொண்டவர் என்பதால் இந்த பாக்ஸ் என்டர்டெயின்மெண்ட் நிறுவனத்தின் சார்பில் மீடியா கிரிக்கெட் சாம்பியன்ஷிப் போட்டியை தற்போது துவக்கியுள்ளார்.
இது திரைப்பட மற்றும் சின்னத்திரை பிரபலங்கள் ஆகியோர் கலந்து கொண்டு விளையாடவுள்ள டென்னிஸ் பால் கிரிக்கெட் போட்டி ஆகும்.
ரசிகர்களுக்கு நன்கு அறிமுகமான 90 திரைப்பட, சின்னத்திரை நட்சத்திரங்கள் இதில் பங்கு கொள்கிறார்கள். ஆறு கேப்டன்கள் இந்த குழுவை வழி நடத்த உள்ளார்கள்.
விஜய் டிவியிலிருந்து மா.கா.பா., சித்தார்த், சன் டிவியிலிருந்து ஆர்யன், அசார் மற்றும் ‘கோலி சோடா’ புகழ் கிஷோர் உள்ளிட்டோர் இந்த நட்சத்திர அணியை வழி நடத்த இருக்கின்றனர்.
லீக் போட்டிகளில் விளையாட உள்ள இந்த அணிகள் இரண்டு குழுக்களாக பிரிக்கப்பட இருக்கின்றன. ஒவ்வொரு குழுவில் இருந்தும் முன்னிலை வைக்கும் 2 அணிகள் அரையிறுதி போட்டிக்கும், அதை தொடர்ந்து இறுதிப் போட்டிக்கும் முன்னேறுவார்கள்.
இறுதிப் போட்டியில் வெல்பவர்களுக்கு ஒன்றரை லட்சம் ரூபாய் பரிசுத் தொகையும் மற்றும் பல பரிசுப் பொருட்களும் வழங்கப்பட இருக்கிறது. இசையமைப்பாளரும், நடிகருமான ஜி.வி.பிரகாஷ் குமார் இந்த நிகழ்ச்சியை வழங்கும் எம்.ஏ.ஆர்.சி. (MARC)யுடன் இணைந்து வெற்றி பெறுபவர்களுக்கு கோப்பையை வழங்க இருக்கிறார்.
இந்த கிரிக்கெட் போட்டி சென்னையில் போரூருக்கு அருகிலுள்ள கோவூரில் அமைந்துள்ள உள்ள டென்னிஸ் விளையாட்டு நகரத்தில் வரும் வரும் ஏப்ரல் 30-ம் தேதி நடைபெற இருக்கிறது.
