90-ஸ் கிட்ஸ், 2k கிட்ஸ் என அனைவருக்கும் பிடித்த அழகான பள்ளிக்கூட திரைப்படத்தை உருவாக்குகிறது ஒரு புதிய திறமைசாலிகள் அடங்கிய பட்டாளம்.
ரோமியோ பிச்சர்ஸ் தயாரிப்பு நிறுவனமும், பிளாக் ஷீப் ஊடக குழுவினரும்தான் இந்தப் புதிய திறமைசாலிகள். இவர்கள்தான் தற்போது இணைந்து ஒரு புதிய படத்தை கருவாக்கி உருவாக்க இருக்கிறார்கள்.
யூ டியூப் சேனலாகத் தொடங்கி இன்று தங்களுக்கென ஒரு சேட்டிலைட் டிவி, ஓடிடி என வளர்ந்து நிற்கும் பிளாக் ஷீப் இளைஞர் பட்டாளத்தின் மற்றுமொரு மைல் கல்லாய் பள்ளிக்கூட பருவத்தை மையமாக வைத்த புத்தம் புதிய திரைப்படத்தை எழுதியிருக்கிறார்கள்.
தமிழ் சினிமாவின் மிக முக்கியமான பல வெற்றிப் படங்களில் பங்களிப்பு செய்து வரும் ரோமியோ பிக்சர்ஸ் ராகுல், பிளாக் ஷிப்பின் இந்த கனவுத் திரைப்படத்தை தயாரிக்கிறார்.
பிரபல டிஜிட்டல், தொலைக்காட்சி மற்றும் மேடைப் பேச்சு நட்சத்திரமான தமிழ்ப்பேச்சு ராஜ்மோகன் இந்தப் படத்தை எழுதி, இயக்குகிறார்.
மக்களை மகிழ்விக்கும் பல நட்சத்திரங்களின் பட்டாளமே இந்தப் பள்ளிக் கூட படத்தில் உள்ளது. தொழில் நுட்ப கலைஞர்களின் பட்டியலோடு நட்சத்திரங்களின் பட்டியலும் விரைவில் வெளிவர உள்ளது.
வரும் டிசம்பர் 12-ம் தேதி படப்பிடிப்பு பணிகள் துவங்க உள்ளது. அடுத்தாண்டு கோடை கால விடுமுறையில் இந்தப் படம் திரைக்கு வரவுள்ளது.
