தொலைக்காட்சித் தொடர்களின் மூலம் இல்லம் தேடி மக்கள் மனதில் அமர்ந்திருக்கும் ஒரு நடிகராக வளர்ந்திருப்பவர் சித்து.
இவர் நடித்த திருமணம், ராஜா ராணி போன்ற தொடர்கள் மிகவும் புகழ் பெற்றவை. இவர் திரையுலகில் கதாநாயகனாக அறிமுகமாகும் படம் ‘அகோரி’.
இதுவரை சின்னத்திரை மூலம் தனது திறமையை வெளிப்படுத்திய இவர், பெரிய திரை உலகில் காலடி எடுத்து வைத்துள்ளதால், தான் அறிமுகம் ஆகியுள்ள இந்தப் படத்தைப் பெரிதும் நம்பியிருக்கிறார்.
மோஷன் பிலிம் பிக்சர்ஸ் நிறுவனத்தின் சார்பில் தயாரிப்பாளர் சுரேஷ் கே.மேனன் இந்தப் படத்தைத் தயாரித்திருக்கிறார்.
‘பாரதி’ படத்தின் மூலம் பாரதியாகவே மக்கள் மனதில் அழுத்தமாக இடம் பிடித்த சாயாஜி ஷிண்டே இந்தப் படத்தில் ‘அகோரி’யாக நடித்துள்ளார்.
தெலுங்கில் ‘சஹா ‘படத்தின் மூலம் புகழ் பெற்ற ஜக்குல்லா பாபு தமிழில் வில்லனாக இப்படத்தில் வருகிறார். இவரது உயரம் 6.5″ ஆகும்.
நாயகியாக ஸ்ருதி ராமகிருஷ்ணன் நடித்திருக்கிறார். இவர் கர்நாடக மாநில அரசின் விருது பெற்றவர். இவர் ‘144’ பட நாயகியும் கூட.
இவர்களுடன் மைம் கோபி, டார்லிங் மதனகோபால், ரியாமிகா, மாதவி, வெற்றி, கார்த்தி, ‘கலக்கப் போவது யாரு’ சரத், டிசைனர் பவன் ஆகியோரும் நடித்துள்ளனர்.
கூத்துப் பட்டறையில் பயிற்சி பெற்ற புதிய கலைஞர்களும் இப்படத்தில் நடித்திருக்கிறார்கள்.
‘அகோரி’ படத்துக்கு ஒளிப்பதிவு வசந்த். இவர் ‘ஈகோ’, ‘கள்ளத் துப்பாக்கி’ படங்களின் ஒளிப்பதிவாளர். இசை ஃபோர் மியூசிக். இவர்கள் அண்மையில் கேரளாவில் புகழ் பெற்று வருகிறார்கள். நான்கு இசையமைப்பாளர்களின் கூட்டணி இது.
‘ராட்சசன்’ படத்தின் CG டீமின் அக்ஷயா ஸ்டுடியோஸ் அசோக் குமார் இப்படத்தில் பணிபுரிந்துள்ளனர்.
படத்தை இயக்கியிருப்பவர் அறிமுக இயக்குநரான D.S.ராஜ்குமார்.
சிவனடியாராக உள்ள ஓர் அகோரிக்கும், தீய சக்திகளுக்கும் நடக்கும் போராட்டமே கதை.
இது ஒரு முழுமையான பொழுதுபோக்குப் படம். ஆறிலிருந்து அறுபது வரை அனைத்து வயதினருக்குமான வணிக அம்சங்கள் படத்தில் இருக்கும்படி உருவாகியிருக்கிறது.
இப்படத்திற்காக ஹரித்துவாரில் செட் அமைத்து அகோரிகளுடன் சாயாஜி ஷிண்டே நடித்த காட்சி, மற்றும் கேரளாவின் காட்டுப் பகுதியில் பெரிய செட் போடப்பட்டு அகோரிகள் நடித்த காட்சிகளும்
படமாக்கப்பட்டன.
படத்தில் இடம் பெறும் கம்ப்யூட்டர் கிராபிக்ஸ் காட்சிகள் கண்களை மிரள வைக்கும்படி இருக்கும்.
படத்தில் கிராபிக்ஸ் காட்சிகள் மிரட்டலாக வந்திருப்பதாகப் படக் குழுவினர் மகிழ்ச்சி தெரிவித்துள்ளனர்.
‘அகோரி’ படத்தைப் பார்த்த சென்சார் அதிகாரிகள் ‘நல்ல பொழுதுபோக்குடன் அமைந்த திகில் கதையாக படம் இருக்கிறது” என்று பாராட்டி உள்ளனர்.
குழந்தைகள், பெரியவர்களுடன் பார்க்கும்படியாக இருப்பதால் யூ / ஏ சான்றிதழ் கொடுத்துள்ளார்கள்.
இப்படத்தைத் திரையரங்குகளில் PVR சினிமாஸ் வெளியிடுகிறது. பிரம்மாண்டமான பல வெற்றிப் படங்களை வெளியிட்ட பி விஆர் சினிமாஸ் இப்படத்தை வெளியிடுவதில் இருந்து படத்தின் நம்பகத்தன்மையும், வணிக மதிப்பும் அதிகரித்துள்ளன.
