போதைக்கு எதிரான சமூகக் கருத்தை மையமாகக் கொண்டு உருவாகியுள்ள தென்னிந்தியத் தமிழ் திரைப்படம் ‘நல்ல படம்’.
Harish cinemas சார்பில் ஏ. அழகு பாண்டியன் தயாரிக்கும் இப்படத்தை, ‘கெட்டவன்னு பேரெடுத்த நல்லவன்டா’ திரைப்படத்தை இயக்கிய இயக்குநர் சி. பிரபுராம் எழுதி இயக்கியுள்ளார்.
இப்படத்தில் டாக்டர் ஏ. ஹரிஷ் கதாநாயகனாகவும், தனலட்சுமி கதாநாயகியாகவும் நடித்துள்ளனர்.
இவர்களுடன் மொட்டை ராஜேந்திரன், கல்கி ராஜா, ரமா, பிரியதர்ஷினி ராஜ்குமார் உள்ளிட்ட பலர் முக்கிய கதாபாத்திரங்களில் நடித்துள்ளனர்.
சகிஷ்னா சேவியர் இசையமைத்துள்ளார். பாடல்களை இலங்கையைச் சேர்ந்த பிரபல கவிஞரும், தமிழ் சினிமா பாடலாசிரியருமான பொத்துவில் அஸ்மின் எழுதியுள்ளார்.
வேல்முருகன், அருள் பிரகாசம், புண்ணியா செல்வா, காயத்ரி ராஜீவ் மற்றும் சஷாங் உள்ளிட்டோர் பாடல்களுக்கு குரல் வழங்கியுள்ளனர்.
இந்தப் படத்தின் இசை வெளியீட்டு விழா சமீபத்தில் கொழும்பில் உள்ள Sooriyan FM மேடையில் பிரம்மாண்டமாக நடைபெற்றது.
இதனைத் தொடர்ந்து, படத்தின் இசை இருவட்டு மற்றும் ட்ரைலர், இலங்கையின் கடற்றொழில், நீரியல் மற்றும் கடல் வளங்கள் அமைச்சர் ராமலிங்கம் சந்திரசேகரன் அவர்களால் அவரது அமைச்சு அலுவலகத்தில் வைத்து உத்தியோகப்பூர்வமாக வெளியிடப்பட்டது.
இந்நிகழ்வில் படத்தின் பாடல்களை ரசித்த அமைச்சர் ராமலிங்கம் சந்திரசேகரன், பாடல்களையும் படக் குழுவினரின் முயற்சிகளையும் பாராட்டியதுடன், ‘நல்ல படம்’ படத்தின் வெற்றிக்கும், படக் குழுவினருக்கும் தனது வாழ்த்துகளை தெரிவித்தார்.
இந்தச் சிறப்பு நிகழ்வில் பிரபல கவிஞரும், ‘அய்யோ சாமி’ பாடல் புகழ் தமிழ் சினிமா பாடலாசிரியருமான பொத்துவில் அஸ்மின், படத்தின் கதாநாயகன் டாக்டர் ஏ. ஹரிஷ் மற்றும் படக் குழுவினர் கலந்து கொண்டனர்.
இசை வெளியீட்டுக்குப் பின்னர் ‘நல்ல படம்’ திரைப்படத்தின் பாடல்களுக்கு ரசிகர்கள் மத்தியில் சிறப்பான வரவேற்பு கிடைத்து வருகிறது.
மேலும், அந்நாட்டின் முன்னணி வானொலி மற்றும் தொலைக்காட்சி ஊடகங்களில் திரைப்படத்தின் பாடல்கள், ட்ரைலர், இசை வெளியீடு மற்றும் படக் குழுவினரின் நேர்காணல்கள் தொடர்ந்து இடம் பெற்று வருகின்றன.
சமூக வலைத்தளங்கள் மற்றும் இணையவழித் தளங்கள் மூலமாகவும் திரைப்படத்தின் இசை மற்றும் பாடல்கள் இலங்கை மட்டுமின்றி சர்வதேச தமிழ் ரசிகர்களையும் சென்றடைந்து வருகின்றன.
போதைக்கு எதிரான சமூகக் கருத்தை மையமாகக் கொண்டுள்ள ‘நல்ல படம்’, இலங்கையிலும் குறிப்பிடத்தக்க கவனத்தைப் பெற்றுள்ள நிலையில், அங்கு கிடைத்து வரும் வரவேற்பு படக் குழுவினருக்கு மேலும் உற்சாகத்தை அளித்துள்ளது.
படப்பிடிப்பு தொடங்கிய நாள் முதல் இறுதிக்கட்ட படப்பிடிப்புவரை திட்டமிட்டபடி நடைபெற்ற ‘நல்ல படம்’ திரைப்படத்தின் முழு படப்பிடிப்பு பணிகளும் தற்போது வெற்றிகரமாக நிறைவடைந்துள்ளன.
படக் குழுவினரின் முழுமையான அர்ப்பணிப்பு மற்றும் ஒத்துழைப்புடன் படப்பிடிப்பு பணிகள் சிறப்பாக நிறைவு பெற்றதாக தயாரிப்பு தரப்பு தெரிவித்துள்ளது.
இலங்கையில் இசை மற்றும் ட்ரைலர் வெளியீடும் சிறப்பாக நடைபெற்றுள்ள நிலையில், ‘நல்ல படம்’ திரைப்படம் வரும் செப்டம்பர் மாதம் உலகம் முழுவதும் திரையரங்குகளில் வெளியாகத் தயாராகி வருகிறது.
திரைப்படத்தின் வெளியீட்டு தேதி மற்றும் அடுத்தடுத்த முக்கிய அறிவிப்புகள் விரைவில் அதிகாரப்பூர்வமாக வெளியாகும் என படக் குழுவினர் தெரிவித்துள்ளனர்.
