இன்றைய தலைமுறையின் காதல் கதைகள் வெறும் வார்த்தைகளில் மட்டுமல்ல, காட்சிகளிலும் இசையிலும் தங்களுக்கான அடையாளத்தை உருவாக்கி வருகின்றன.
அந்த வகையில், நகர்ப்புற இளைஞர்களின் உணர்வுகளையும் கலாச்சார எல்லைகளைத் தாண்டிய காதலின் அழகையும் மையப்படுத்தி உருவாகியுள்ள புதிய இசை வீடியோ “BLOOM” தற்போது கவனம் ஈர்த்துள்ளது.
Aur Ek Flower’s நிறுவனத்தின் சார்பில் ஆதித்யா கிருஷ்ணமூர்த்தி தயாரித்துள்ள இந்த இசை வீடியோவை ராகுல் அசோக் குமார் இயக்கியுள்ளார்.
வளர்ந்து வரும் இளம் கலைஞர்களான விநாயக் வைத்தியநாதன் மற்றும் அக்ஷயா உதயகுமார் முன்னணி கதாபாத்திரங்களில் நடித்துள்ளனர்.
ஒரு நாளின் காலப் பகுதிக்குள் நடைபெறும் காதல் அனுபவத்தை மையமாகக் கொண்டு உருவாக்கப்பட்டுள்ள இந்த BLOOM, காதல், நினைவுகள், மாற்றம் மற்றும் மனித உறவுகளின் நுட்பமான தருணங்களை காட்சிப்படுத்துகிறது.
குறிப்பாக சென்னை இளைஞன் மற்றும் பெங்களூரைச் சேர்ந்த இளம்பெண் இடையே உருவாகும் உறவை பின்னணியாகக் கொண்டு, மொழி மற்றும் கலாச்சார வேறுபாடுகளைத் தாண்டி உணர்வுகள் எப்படி மனிதர்களை இணைக்கின்றன என்பதை படைப்பு பேசுகிறது.
இந்த இசை வீடியோவில் சென்னை நகரம் வெறும் பின்னணியாக மட்டுமல்லாமல், கதாபாத்திரங்களின் உணர்ச்சிகளுக்கு உயிர் கொடுக்கும் ஒரு முக்கிய கூறாக அமைந்துள்ளது.
நகரின் வண்ணமயமான தெருக்கள், இயல்பான சூழல்கள் மற்றும் உணர்வுகளை பிரதிபலிக்கும் காட்சிகள், கதையின் ஓட்டத்துடன் ஒன்றிணைந்து பயணிக்கின்றன.
டிஜிட்டல் தளங்களில் பல்வேறு படைப்புகள் மூலம் கவனம் பெற்ற விநாயக் வைத்தியநாதன், BLOOM மூலம் மீண்டும் ஒரு மென்மையான காதல் கதையில் தோன்றுகிறார்.
அவருடன் இணைந்து நடித்துள்ள அக்ஷயா உதயகுமார், சினிமா, டிஜிட்டல் மீடியா மற்றும் நாடக மேடைகளில் தனது தனித்துவமான பயணத்தை தொடர்ந்து வருபவர் என்பது குறிப்பிடத்தக்கது.
இசையமைப்பாளர் பரத் தனசேகர், BLOOM-க்கு மென்மையான காதல் உணர்வுகளை இசை வழியாக வழங்கியுள்ளார். காதலின் இனிமையையும் நினைவுகளின் நெகிழ்ச்சியையும் இசையில் பதிவு செய்யும் முயற்சியாக இந்தப் பாடல் உருவாகியுள்ளது.
காட்சியமைப்பே BLOOM-இன் மிகப்பெரிய பலமாகக் கருதப்படுகிறது. ஒவ்வொரு ஃப்ரேமும் ஓர் ஓவியத்தைப் போல வடிவமைக்கப்பட்டுள்ளதுடன், இயற்கை ஒளியமைப்பு, மென்மையான நிறத் தேர்வுகள் மற்றும் குறியீட்டு காட்சிகள் மூலம் உணர்வுகளை வெளிப்படுத்தும் சினிமாப் பாணி இதில் பயன்படுத்தப்பட்டுள்ளது.
Gen Z தலைமுறையினரையும் நகர்ப்புற இளைஞர்களையும் இலக்காகக் கொண்டு உருவாக்கப்பட்டுள்ள BLOOM, காதல், பயணம், நினைவுகள் மற்றும் நகர வாழ்க்கையோடு இணைந்த உணர்வுகளை ரசிக்கும் பார்வையாளர்களிடம் நல்ல வரவேற்பைப் பெறும் என எதிர்பார்க்கப்படுகிறது.
Divo YouTube சேனல் மூலம் வெளியாகியுள்ள இந்த இசை வீடியோ, இளம் தலைமுறையினருக்கான காதல் உள்ளடக்கங்களில் தனித்துவமான இடத்தைப் பெறும் என்ற நம்பிக்கையை படக்குழுவினர் தெரிவித்துள்ளனர்.
தொழில் நுட்பக் குழு:
இயக்கம் – ராகுல் அசோக் குமார்
தயாரிப்பு – ஆதித்யா கிருஷ்ணமூர்த்தி (Aur Ek Flower’s)
நடிப்பு – விநாயக் வைத்தியநாதன், அக்ஷயா உதயகுமார்
இசை – பரத் தனசேகர்
ஒளிப்பதிவு – அருண் VJK
படத்தொகுப்பு – பவித்ரன்
நடன அமைப்பு – ரிச்சர்ட் சன்
PRO – ரேகா
